एजेन्सी – डिफेन्डिङ च्याम्पियन इंग्लिस क्लब लिभरपुल युइएफए च्याम्पियन्स लिग फुटबलको नकआउट नजिक पुगेको छ । मंगलबार राति भएको खेलमा बेल्जियन क्लब जेन्कलाई २–१ ले पराजित गर्दै लिभरपुल नकआउट नजिक पुगेको हो ।

समूह चरणमा दुई खेल बाँकी रहँदा लिभरपुलले अब एक खेलमा जित हात पारे नकआउट चरणमा स्थान बनाउनेछ । लिभरपुल ४ खेलबाट ९ अंक जोडेर शीर्षस्थानमा उक्लिएको छ । लिभरपुलले अब नेपोली र साल्जवर्गसँग खेल्न बाँकी छ ।

एनफिल्डमा मंगलबार राति भएको खेलमा लिभरपुललाई जिताउन जर्जिन्हो विज्नल्डम र अक्सलेड चेम्वरलेनले गोल गरे । पाहुना टोलीका एमवीवाना समताले सान्त्वना गोल फर्काए । खेलको १४औं मिनेटमा जर्जिन्हो विज्नल्डमको गोलबाट लिभरपुलले खेलमा शुरुवाती अग्रता लिएको थियो । ४१औं मिनेटमा एमवीवानाले गोल गरेपछि पहिलो हाफ १–१ गोलको बराबरीमा सकिएको थियो ।

५३औं मिनेटमा अक्सलेड चेम्वरलेनले गोल गर्दै लिभरपुललाई खेलमा पुन अग्रता दिलाए । चेम्वरलेनले मोहम्मद सलाहको पासमा गोल गरेका थिए । त्यसपछि थप गोल निस्कन नसक्दा लिभरपुल २–१ ल्े विजयी हुन सफल भयो । हारसँगै जेन्क १ अंकसहित पुछारमा छ ।

यही समूह ‘ई’ मा इटालियन क्लब नेपोली र अष्ट्रिय क्लब साल्जवर्गले १–१ गोलको बराबरी खेल्दै अंक बाँडेका छन् । नेपोली ८ अंकसहित दोस्रो स्थानमा छ । साल्जवर्ग ४ अंक जोडेर तेस्रो स्थानमा छ ।