एजेन्सी – स्पेनिस ला लिगा अन्तर्गत शनिबार रियल म्याड्रिडले रियल बेटिसको सामना गर्दैछ । पछिल्लो खेलमा लेगानेसमाथि ५-० को सहज जित दर्ता गरेको रियल लगातार तेस्रो जित हासिल गर्ने सुरमा हुनेछ ।

रियलका लागि लेगानेसविरुद्ध जारी सिजन अपेक्षित प्रदर्शन गर्न नसकेका खेलाडीले राम्रो प्रदर्शन गरेका थिए । गोलरक्षक थिबाउट कोर्टुवाले क्लिन सिट राख्दा लुका जोभिचले रियलका लागि पहिलो गोल गरे । यस्तै इडेन हाजार्डले पनि समर्थकहरुको मन जिते । उक्त प्रदर्शनलाई निरन्तरता दिएमा रियलले बेटिसविरुद्ध सहज जित दर्ता गर्ने आंकलन गर्न सकिन्छ ।

बेटिसले सान्टियागो बर्नाबाउमा खेलेका ५३ खेलमध्य ७ पटक मात्र जित दर्ता गरेको छ । यस सिजन बेटिसको प्रदर्शन खासै राम्रो हुन सकेको छैन । मुख्य मिडफिल्डर जिओभानी लो सेल्सो प्रिमियर लिग क्लब टोटेनहम गएपछि क्लबलाई केहि समस्या परेको छ । लिगको ११ खेल सकिंदा बेटिसको १२ अंकमात्र छ । रियलविरुद्ध खराब नतिजा आएको खण्डमा प्रशिक्षक रुबीको जागिर पनि खतरामा पर्नेछ ।

रियलका लागि यस खेलमा ग्यारेथ बेल, लुकास भाज्केज र हामेस रोड्रीग्वेज उपलब्ध छैनन् । युवा फरवार्ड भिनिसियस लेगानेसविरुद्ध खेलमा अनुपस्थित रहेपछि यसपटक भने टोलीमा समेटिएका छन् । मार्को एसेन्सियो र नाचो फर्नान्डेज चोटका कारण लामो समय मैदानबाहिर रहनेछन् । जारी सिजन उत्कृष्ट लयमा रहेका फरवार्ड करीम बेन्जेमामाथि रियलको भरोसा रहनेछ । उनले यस सिजन ७ गोल गरिसकेका छन् । लगातार आक्रमणमा अन्य खेलाडी परिवर्तन हुँदा बेन्जेमाले जिम्मेवारीपूर्वक आफ्नो भूमिका निर्वाह गरेका छन् ।