एजेन्सी – क्याटलान क्लब बार्सिलोनाले आज राति स्पेनिस ला लिगामा लेभान्टेसँग प्रतिस्पर्धा गर्दैछ । खेल लेभान्टेको मैदानमा राति ८ः४५ बजेपछि शुरु हुनेछ ।

ला लिगाको पाँचौ राउन्डमा ग्रानडासँग २–० ले स्तब्ध भएयता बार्सिलोनाले लगातार ७ खेलमा जित हात पारेको छ । बार्सिलोनाले पछिल्ला ७ खेलमा जित निकाल्दा भिल्लारियल, गेटाफे, इन्टर मिलान, सेभिल्ला, इवर, स्लाभिया प्राहा र रियल भालाडोलिडलाई शिकार बनाएको थियो । यस्तोमा बार्सिलोना लगातार आठौं जितको खोजीमा हुनेछ ।

लेभान्टेविरुद्ध बार्सिलोनाका कप्तान लियोनेल मेस्सी र लुइस सुआरेज पहिलो रोजाईमा रहँदा एन्टोइन ग्रिजमनले पनि सुरुवाती ११ मा खेल्ने सम्भावना छ । औसमाने डेम्वेले २ खेलको प्रतिबन्धबाट फर्केपनि टोलीमा समावेश छैनन् । यस्तै इभान राकिटिक, आर्थर र फ्रान्की डि जोङ टोलीमा रहनेछन् । अघिल्लो खेलमा फ्रिकिकमार्फत ५० गोल पुरा गरेका कप्तान मेस्सी नै टोलीको मुख्य हतियार हुनेछन् ।

यता, चोटसँग जुधिरहेको लेभान्टे बार्सिलोनालाई स्तब्ध पार्ने रणनीतिमा मैदानमा उत्रनेछ । टोनो, इभान लोपेज, ओइर ओलाजावाल र रोवर्ट पिएर बार्सिलोनाविरुद्धको खेलमा टोलीमा हुने छैनन् । तर, अघिल्लो खेलमा रियल सोसिडाडमाथि २–१ को जितले टोलीको आत्मविश्वास बढेको छ । पछिल्ला ६ खेलमा लेभान्टेले समान २ (जित, बराबरी र हार ) को मिश्रित नतिजा निकालेको छ ।

१० खेलबाट २२ अंकसहित बार्सिलोना शीर्षस्थानमा छ । समान खेलबाटै २१ अंक जोडेको रियाल म्याड्रिड दोस्रो स्थानमा रहेको छ । लेभान्टे १४ अंकसहित ११औं स्थानमा छ ।

ला लिगाको खेलहरु

इस्पान्योलविरुद्ध भ्यालेन्सिया (५ः४५ बजे)

लेभान्टेविरुद्ध बार्सिलोना (राति ८ः४५ बजे)

सेभिल्लाविरुद्ध एट्लेटिको मड्रिड (राति ११ः१५ बजे)

रियल म्याड्रिडविरुद्ध रियल बेटिस (आइतबार बिहान १ः४५ बजे)