प्रकाश तिमल्सिना, काठमाडौं

फिफा विश्वकप २०२२ को दोस्रो चरणको छनोट अन्तर्गत पाँचौ खेलमा नेपालले कुवेतको सामना गर्दैछ । नेपालको एकमात्र अन्तर्राष्ट्रिय रंगशाला त्रिपुरेश्वरस्थित दशरथ रंगशालामा हुने उक्त खेलका लागि शुक्रबार साँझ फ्लडलाइट्सको सफल परिक्षण गरिएको छ ।

नेपाल र कुवेतबिचको खेल साँझ ५:४५ बजे हुने तयारी गरिएको छ । सोहिअनुरुप आज रंगशालाको फ्लडलाइट्सको सफल परिक्षण गरिएको हो । यससँगै पूर्वनिर्धारित समय अनुसार नै नेपाल र कुवेतबीचको खेल हुने पक्कापक्कि भएको छ । यसअघि कुवेतविरुद्ध अवे खेलमा नेपाल ७-० ले पराजित भएको थियो ।

शुक्रबार परिक्षण कार्यक्रममा युवा तथा खेलकुद मन्त्री जगतबहादुर विश्वकर्मा, राष्ट्रिय खेलकुद परिषदका सदस्यसचिव रमेशकुमार सिलवाल, अखिल नेपाल फुटबल संघका अध्यक्ष कर्माछिरिङ शेर्पा लगायतको उपस्थिति रहेको थियो । राखेपले सागलाई लक्षित गरेर रंगशालाको तयारी थालेपनि विश्वकप छनोटको खेल समेत आयोजना गर्ने लक्ष्यसहित तयारी थालेको छ । यद्यपि समय अभाव हुँदा सागको चटारो काम सक्न हतारोझैं हुन पुगेको छ ।

दशरथ रंगशालामा यसअघि सन् २०१३ मा साफ च्याम्पियनसिपको फाइनल खेल फ्लडलाइट्समा खेलाइएको थियो । त्यसयता नेपालले रातमा खेल आयोजना गरेको वा खेलेको छैन । सन् २०१५ मा एएफसी यू-१४ गर्ल्स रिजनल च्याम्पियनसिप (साउथ एण्ड सेन्ट्रल) को अन्तिम दिनमा भूकम्प आएपछि त्यसयता पुनर्निर्माणमै रहेको रंगशालामा खेल हुन सकेको थिएन ।

यो पनि पढ्नुहोस् : सागको चटारो, काम सक्न हतारो