एजेन्सी– आर्सनललाई टाइब्रेकरमा ५–४ ले पराजित गर्दै लिभरपुल कारबाओ कपको क्वार्टरफाइनलमा पुगेको छ । गए राती निर्धारित ५–५ को बराबरीपछिको टाइब्रेकरमा लिभरपुलले बाजी मारेको थियो । डिभोक ओरिगीले इन्जुरी समयको चौथो मिनेटमा  बराबरी गोल गरेपछि खेल लम्बिएको थियो ।

छैटौं मिनेटमा स्कोर्डान मुस्ताफीको आत्मघाती गोलमा योर्गन क्लोपको टोलीले अग्रता लिएको थियो । तर लुकास टोरिराले १९ औं मिनेटमा बराबरी गोल गरेका थिए । गाब्रियल मार्टिनेलीले २६ औं र ३६ औं मिनेटमा गोल गरेपछि आर्सनल ३–१ ले अगाडि लागेको थियो । ४३ औं मिनेटमा जेम्स मिल्नरले पेनाल्टी गोल गरेपछि लिभरपुलले अन्तर घटाएको थियो ।

५४ औं मिनेटमा एन्सले मेटल्यान्ड नाइल्सले गोल गर्दै पुन आर्सनलको अन्तरलाई बढाए । त्यसपछि लिभरपुलले ४ मिनेटको फरकमा २ गोल गर्दै खेलमा पुनरामगन गरेको थियो । एलेक्स अक्सलाडे चेम्बरलेनले ५८ औं र ओरिगीले ६२ औं मिनेटमा गोल गर्दैै अन्तर कम गरे । त्यो अवस्थामा सम्म पनि आर्सनल नै अघिल्लो चरण जाने सम्भावना देखिएको थियो ।

तर ओरिगीले इन्जुरी समयमा गोल गर्दै खेललाई ५–५ को अवस्थामा पुर्याए र खेल पेनाल्टीमा गयो । उनले निको विलियमको पासमा गोल गरेका थिए । सुरुवाती ३ पेनाल्टीमा दुवै टोलीले गोल गरे । चौथोमा आर्सनलका ड्यानी सेबालोस असफल भए । लिभपरुलका लागि ओरिगीले गोल गरे । पाँचौं पेनाल्टीमा आर्सनलका नाइल्सले गोल गरेपनि लिभपुलका कर्टिस जोन्सको गोल निर्णायक बन्यो ।