एजेन्सी – क्याटलान क्लब बार्सिलोनाका कप्तान लिओनेल मेस्सीले आफ्नो करीअरमा फ्रिकिकमार्फत मात्रै अर्धशतक अर्थात् ५० गोल पूरा गरेका छन् । मंगलबार भालाडोलिडविरुद्ध ५-१ को जितमा २ गोल र २ असिस्ट गरेका मेस्सीले फ्रिकिकमा गोल गर्दै उक्त आँकडा पार गरेका हुन् ।

मेस्सीले खेलको ३५ औं मिनेटमा पेनाल्टी क्षेत्रभन्दा केहि बाहिर रहेको फ्रिकिकलाई सिधै गोलमा परिणत गर्दै बार्सिलोनाको अग्रता दोब्बर पारेका थिए । उनले पहिलोपटक सन् २००८ मा एटलेटिको म्याड्रिडविरुद्ध ला लिगाअन्तर्गत क्याम्प नोउमा फ्रिकी गोल गरेका थिए । त्यसयता उनले बार्सिलोनाबाट ४४ तथा अर्जेन्टिनाबाट ६ पटक फ्रिकिकमा गोल गरेका छन् ।

मेस्सीले ५० मध्य ३३ गोल ला लिगामा गरेका छन् । च्याम्पियन्स लिगमा ५, कोपा डेल रेमा ३, युरोपेली सुपर कपमा २ तथा स्पेनिस सुपर कपमा १ गोल गरेका उनले बाँकी छ भने राष्ट्रिय टोलीको जर्सीमा गरेका हुन् । यसमध्य २९ गोल घरेलु मैदान, १६ गोल अवे मैदान तथा ५ गोल न्युट्रल मैदानमा सम्भव भएका छन् ।

मेस्सीले एस्पान्योलविरुद्ध सर्वाधिक ६ पटक सिधै फ्रिकिकमा गोल गरेका छन् । त्यसपछि सेभिल्ला र एथ्लेटिक बिल्बाओविरुद्ध ५-५ पटक तथा एटलेटिको म्याड्रिडविरुद्ध ३ गोल फ्रिकिकमा सम्भव भएका छन् । डेपोर्टिभो, रियल म्याड्रिड, अल्मेरिया, बेटिस, भिल्लारियल र अलाभेसविरुद्ध पनि २-२ पटक उनले फ्रिकिक गोल गरेका छन । मेस्सीले सन् २०१५ सेभिल्ला तथा सन् २०१८ मा एस्पान्योलविरुद्ध एकै खेलमा २ पटक फ्रिकिक गोल समेत गरेका थिए ।