एजेन्सी – कप्तान लिओनेल मेस्सीको सानदार प्रदर्शनसँगै बार्सिलोनाले स्पेनिस ला लिगा अन्तर्गत मंगलबार रियल भालाडोलिडलाई ५-१ को फराकिलो अन्तरले पराजित गरेको छ । मेस्सीले २ गोल र २ असिस्ट प्रदान गर्ने क्रममा फ्रिकिकमा समेत गोल गरे ।

खेलको दोस्रो मिनेटमा नै बार्सिलोनाले अग्रता लिएको थियो । क्लेमेन्ट लेङलेटले भालाडोलिडको डिफेन्सले क्लियर गर्न नसकेको बलमा गरेको शक्तिशाली प्रहार क्रसबारमा लाग्दै गोलमा परिणत भएको थियो । १५ औं मिनेटमा नै भालाडोलिडले खेल बराबरीमा ल्यायो । फ्रिकिकमा आएको प्रहारलाई बार्साका गोलरक्षक मार्क आन्दर टेर स्टेगनले बचाएपनि रिबाउन्डमा किको ओलिभासले गोल गर्न सफल रहे ।

खेलको २९ औं मिनेटमा बार्सिलोनाले पुन: अग्रता कायम गर्यो । लिओनेल मेस्सीको पासमा आर्टुरो भिडालले गोल गर्द्दै बार्सिलोनालाई अगाडी बढाए । त्यसको ५ मिनेटपछि नै मेस्सीले अग्रता दोब्बर पारे । मेस्सीले पेनाल्टी क्षेत्रबाहिर प्राप्त फ्रिकिकलाई दर्शनीय गोलमा परिणत गरेका थिए । मेस्सीको यो ५० औं फ्रिकिक गोल पनि हो ।

खेलको ७५ औं मिनेटमा मेस्सीले व्यक्तिगत दोस्रो गोल गरे । इभान राकीटिचको पासमा मेस्सीले गरेको प्रहार गोलरक्षक जोर्डी मासिपले बचाउन सकेनन् । त्यसको २ मिनेटमा अर्का फरवार्ड लुइस सुआरेजले पनि गोल गरे । उनले मेस्सीसँग वन-टु पास खेल्दै उत्कृष्ट फिनिस गरेपछि बार्सिलोनाले ५-१ को जित पक्का गरेको थियो ।

यस जितसँगै बार्सिलोनाले लिगको शीर्षस्थानमा पुनरागमन गरेको छ । बार्सिलोनाको १० खेलमा २२ अंक रहेको छ भने दोस्रो स्थानको ग्रानडाले १० खेलमा २० अंक जोडेको छ । तेस्रो स्थानको एटलेटिकोले ११ खेलमा २० अंक जोडेको छ । रियल सोसीडाड र सेभिल्लाको १० खेलमा १९-१९ अंक छ भने रियल म्याड्रिडको ९ खेलमा १८ अंक रहेको छ ।