एजेन्सी – पोलिस फरवार्ड रोबर्ट लेवान्डोस्कीले कीर्तिमान रचेपछि बायर्न म्युनिखले शनिबार युनियन बर्लिनलाई २-१ ले पराजित गरेको छ । लेवान्डोस्कीले बुन्डेसलिगा सिजनको सुरुवाती ९ खेलमा नै लगातार गोल गर्दै कीर्तिमान राखेका हुन् ।

खेलको पहिलो हाफमा नै बेन्जामिन पाभार्डको गोलमा बायर्नले अग्रता लिएको थियो । दोस्रो हाफको ५३ औं मिनेटमा गोल गर्दै लेवान्डोस्कीले बायर्नको अग्रता दोब्बर पारे । यो उनको जारि सिजनको १९ औं गोल पनि हो । खेलको ४ मिनेट समय बाँकी रहँदा बर्लिनका लागि सबास्टियन पोलारले पेनाल्टीमार्फत गोल फर्काएपनि बायर्नले जित दर्ता गर्न सफल रहयो ।

जारी सिजन उत्कृष्ट लयमा रहेका लेवान्डोस्कीले लगातार गोल गरिरहेका छन् । उनले सन् २०१९ मा खेलेका ३७ खेलमा ३७ गोल गरेका छन् । यसक्रममा उनले लिओनेल मेस्सी, क्रिस्टियानो रोनाल्डो र किलियन एमबाप्पेलाई पनि उछिनेका छन् । उनले सिजनमा पनि १४ खेलमा १९ गोल गर्दै सर्वाधिक गोलकर्ता बनेका हुन् । उनले बायर्नका सबै प्रतियोगितामा पछिल्ला १३ खेलमा लगातार गोल गरेका छन् ।

यस जितसँगै बायर्न अंक तालिकाको शीर्ष स्थानमा उक्लिएको छ । बायर्नको ९ खेलमा १९ अंक छ भने दोस्रो स्थानको फ्राइबर्गको १७ अंक छ । डर्टमुन्ड शनिबार साल्केसँग गोलरहित बराबरीमा रोकिँदा ९ खेलमा १६ अंकसहित तेस्रो स्थानमा छ ।