एजेन्सी – पेरिस सेन्ट जर्मेन (पिएसजी) का केलियन एमबाप्पेले सबैभन्दा कम उमेरमा च्याम्पियन्स लिगमा १५ गोल पूरा गर्ने बार्सिलोना कप्तान लियोनल मेस्सीको कीर्तिमानलाई तोडेका छन् ।

एमबाप्पेले २० वर्ष र ३ सय ६ दिनको उमेरमा च्याम्पियन्स लिगमा १५ गोल पूरा गरेका छन् । च्याम्पियन्स लिगमा मंगलबार राती पिएसजीले क्लब ब्रुगलाई ५–० ले हराउँदा एमबाप्पेले ह्याट्रिक गरेका थिए । पीएसजीका लागि बाँकी २ गोल माउर्को इकार्डीले गरेका थिए । एमबाप्पे ५२ औं मिनेटमा वैकल्पिक खेलाडीका रुपमा मैदान प्रवेश गरेका थिए ।

मैदान प्रवेश गरेको नवौं मिनेटमा उनले पहिलो गोल गरे । इकार्डीको दोस्रो गोलका लागि पास मिलाइदिएका एमबाप्पेले दोस्रो गोल ८० औं मिनेटमा गरे । ८३ औं मिनेटमा एन्जेल डि मारियाको पासमा गोल गर्दै एमबाप्पेले ह्याट्रिक पूरा गरे । जसले उनलाई कीर्तिमानी खेलाडीका रुपमा स्थापित गराएको छ । यसअघि बार्सिलोनाका सुपरस्टार मेस्सीले २१ वर्ष २ सय ८८ दिनमा १५ गोल पुरा गर्ने कीर्तिमान बनाएका थिए ।

एमबाप्पे २० वर्षको उमेरमा च्याम्पियन्स लिगमा सर्वाधिक गोल गर्ने खेलाडी बनेका छन् । उनले २१ वर्ष लाग्नुअघि नै १७ गोल पुरा गरेका छन् । त्यस्तै २१ वर्षको उमेरमा च्याम्पियन्स लिगमा १२ गोल गर्दै करिम बेन्जिमा दोस्रो स्थानमा छन् । मेस्सीले रियल म्याड्रिडका महान खेलाडी राउलको कीर्तिमान तोडेका थिए । राउलले २२ वर्ष १ सय ६३ दिनमा च्याम्पियन्स लिगमा १५ गोल पुरा गरेका थिए ।

यसैगरी एम्बाप्पे १० वर्षभन्दा लामो समयपछि वैकल्पिक खेलाडीका रुपमा मैदान प्रवेश गर्दै ह्याट्रिक प्रहार गर्ने पहिलो खेलाडी बने । यसअघि सन् २००८ मा भिल्लारियलबाट खेल्दै जोसेबा लोरेन्टले आलबर्गविरुद्ध दोस्रो हाफमा ह्याट्रिक गरेका थिए । समूह चरणका ३ खेलपछि ९ अंकसहित पिएसजी समूह एको शीर्षस्थानमा छ । ५ अंक कम रहेको रियल म्याड्रिड दोस्रो स्थानमा छ ।