एजेन्सी – इंग्लिस स्टार खेलाडी रहिम स्ट्रलिङको ह्याट्रिक सहयोगमा इंग्लिस क्लब म्यानचेस्टर सिटीले च्याम्पियन्स लिगमा अपराजित यात्रालाई कायमै राखेका छन् ।

सिटीले इटालियन क्लब एटलान्टामाथि ५–१ को फराकिलो जित निकाल्दै समूह चरणमा अपराजित यात्रा कायमै राख्न सफल भएका हुन् । सिटीको फराकिलो जितका स्ट्रलिङले ह्याट्रिक तथा सर्जियो अगुइरोले दुई गोल गरे । पाहुना टोलीका रुस्लान मालिनोभ्स्कीले सान्त्वना गोल फर्काए ।

रुस्लान मालिनोभ्स्कीको पेनाल्टी म्यानचेस्टर सिटी खेलको २८औं मिनेटमा पछि परेको थियो । तर, एटलान्टाको त्यो अग्रता लामो समय टिकेन । ३४औं मिनेटमा अगुइरोले बराबरी गोल फर्काए । ३८औं मिनेटमा अगुइरोले पेनाल्टीमा गोल गर्दै सिटीलाई पहिलो हाफमा २–१ को अग्रता दिलाए ।

दोस्रो हाफमा रहिम चम्कदै ११ मिनेटमा ह्याट्रिक पूरा गरे । ५८औं मिनेटमा फिल फोडेनको पासमा रहिमले पहिलो गोल गर्दा सिटी खेलमा ३–१ ले अघि बढ्यो । ६४औं मिनेटमा इकेए गुन्डोगानको पासमा व्यक्तिगत दोस्रो गोल गरेपछि सिटी फराकिलो जिततर्फ अग्रसर बन्यो ।
६९औं मिनेटमा रियाद महारेजको पासमा रहिमले ह्याट्रिक पूरा गर्दा सिटी ५–१ को फराकिलो जित निकाल्यो ।

८२औं मिनेटमा सिटी १० खेलाडीमा समेटिएपनि त्यसको फाइदा एटलान्टाले उठाउन सकेन । सिटीका फिल फोडेन दोहोरो पहेँलो कार्ड खादै मैदानबाट बाहिरिएको थियो ।

जितसँगै सिटी समूह ‘सी’ मा ९ अंक जोडेर शीर्षस्थानमा छ । डाइनामो जाग्रिव र साख्तर डोनेस्क समान ४ अंक जोडेर दोस्रो र तेस्रो स्थानमा छ । एटलान्टा अंकविहीन हुदै पुछारमा छ । यही समूहको अर्काे खेलमा साख्तर डोनेस्क र डाइनामो जाग्रिवले २–२ गोलको बराबरी खेल्दै अंक बाँडेका छन् ।