एजेन्सी – स्टार खेलाडीद्धय ग्यारेथ बेल र इडेन हजार्डविना स्पेनिस ला लिगामा रियाल म्याड्रिडले सिजनको पहिलो हार बेहोरेको छ । ला लिगामा सिजनको पहिलो हार बेहोर्ने क्रममा रियाल मलोर्कासँग १–० ले स्तब्ध बनेको हो ।

मलोर्कामा शनिबार राति भएको खेलमा १० खेलाडीमा समेटिएको रियाललाई स्तब्ध बनाउन जुनियर लागोले पहिलो हाफमा गरेको गोल नै निर्णायक बन्यो । उनले एलेक्स फेवेसको पासमा खेलको सातौ मिनेटमा गोल गरेको थियो ।

सम्हालिन नपाउदै एक गोलले पछि परेको रियाालले घरेलु टोलीलाई लगातार दवावमा राखेपनि मलोर्काको बलियो रक्षापङ्ति तोड्न नसक्दा सिजनको पहिलो हार बेहोर्न बाध्य बन्यो ।  रियाल ७४औं मिनेटमा १० खेलाडीमा समेटियो । अल्भेरो ओर्डिजोला दोहोरो पहेँलो कार्ड खादै मैदानबाट बाहिरिएपछि रियाल समस्यामा परेको थियो ।

हारपछि रियालले शीर्षस्थानमा पूनरागमन गर्ने मौका गुमाएको छ । रियाल ९ खेलबाट १८ अंक जोडेर दोस्रो स्थानमा रहेको छ । रियाल भन्दा बार्सिलोना १ अंकले अघि रहँदै शीर्षस्थानमा छ । बार्सिलोनाले शनिबार साँझ मात्रै इवरलाई ३–० ले पराजित गर्दै शीर्षस्थानमा उक्लिएको थियो । मलोर्का ९ खेलबाट १० अंक जोडेर १४औ स्थानमा छ ।

यता, एट्लेटिको मड्रिडले १० खेलाडीमा समेटिएको भ्यालेन्सियासँग १–१ गोलको बराबरी खेल्दै अंक बाँडेको छ । एट्लेटिकोका डिएगो कोस्टा र भ्यालेन्सियाका ड्यानियल पारेजोले बराबरी गोल फर्काए । इन्ज्युरी समयमा भ्यालेन्सियाका काङ इन लि रातो कार्ड खादै मैदानबाट बाहिरिएको थियो ।

बराबरीपछि एट्लेटिको १६ अंक जोडेर चौथो स्थानमा छ । भ्यालेन्सिया १३ अंक जोडेर सातौ स्थानमा छ । गेटाफेले लेगानेसलाई २–० ले हरायो ।