काठमाडौं (हाम्रो खेलकुद)– नेपाली प्रशिक्षक बालगोपाल महर्जनले बंगलादेशमा सुखद सुरुआत गरेका छन् । प्रशिक्षण जीवनमा नयाँ यात्रा प्रारम्भ गर्ने क्रममा महर्जन दश दिनअघि बंगलादेश पुगेका थिए । उनको टोली ब्रदर्श युनियन पहिलो खेल जित्दै वाल्टन फेडेरेसन कपको क्वार्टरफाइनल पुगेको छ । उनको टोलीले सोमबार उत्तर बरिधारालाई १–० ले हराएको थियो ।

प्रशिक्षक बालगोपाल महर्जन

३० औं मिनेटमा नाइजेरियन फरवार्ड एकोचा किङ्सलेलाई गोलकिपर मोहम्मद राजिवले लडाएपछि ब्रदर्श युनियनले पनोल्टी पाएको थियो । किङ्सले नै पेनाल्टीमा गोल गरेका थिए ।
पहिलो खेलबाट अन्तिम आठमा प्रवेश गरेको ब्रदर्श युनियनले समूह सीको विजेताका लागि शेख जमला डीसीसँग प्रतिस्पर्धा गर्नेछ । पहिलो खेलमा शेख जमालसँग ६–० ले पराजित भएको बरिधारा प्रतियोगिताबाट बाहिरिएको छ । प्रतियोगितामा १२ टोलीको सहभागिता रहेको छ ।
तीन महिनाको सम्झौतामा ब्रदर्श युनियन पुगेका पूर्व राष्ट्रिय खेलाडी महर्जनले मासिक १ हजार ५ सय डलर पारिश्रमिक पाउँछन् । गत माघमा उनको नेतृत्वमा नेपाली राष्ट्रिय टोलीले बंगबन्धु गोल्डकप जितेपछि ब्रदर्शले उनलाई सम्झौताको प्रस्ताव राखेको थियो । नेपालमा रुस्लान थ्री स्टार र लक्ष्मी हुन्डाई मनाङ मस्याङ्दीलाई प्रशिक्षक दिएका उनले केही समय भारत सिक्किमको डेन्जोङ ब्वाइजको नेतृत्व समेत गरेका थिए । सन् २००५ मा अन्तर्राष्ट्रिय फुटबलबाट सन्यास लिएका महर्जनले २००७ बाट प्रशिक्षण जीवन सुरु गरेका थिए ।