एजेन्सी – इंग्लिस क्लब म्यानचेस्टर युनाइटेडका दुई भरपर्दा खेलाडी मिडफिल्डर पल पोग्वा र गोलरक्षक डेभिड डि गेयाले लिभरपुलविरुद्धको महत्वपुर्ण खेल गुमाउने भएका छन् ।

युनाइटेडले आइतबार राति घरेलु मैदानमा प्रिमियर लिगमा शीर्षस्थानमा रहेको लिभरपुलको आतिथ्यता गर्दैछ । पोग्वा एंकल इन्ज्युरीका कारण तथा गेयाले युरोकप छनोट अन्तरगत स्वीडेनविरुद्धको खेलमा मसल्समा चोट बोकेका थिए । दुवै खेलाडी टोलीमा नरहने पक्का भएसँगै म्यानचेस्टर युनाइटेडलाई समस्या हुन सक्नेछ ।

युनाइटेडका मेडिकल स्टाफहरुले गेयाको सिटी स्क्यानपछि खेल्न नसक्ने पुष्टि गरेको हो । पोग्वाले चोटकै कारण गत अगस्टदेखि मात्रै दुई खेलमा मौका पाएका छन् । गेयाको स्थानमा अब दोस्रो रोजाईका सर्जियो रोमेरोले युनाइटेडको पोस्ट सम्हान्लेछन् ।  युनाइटेडमा आरोन वान विशाखा, एन्थोनी मार्सियल, डिएगो डालोट, जेसे लिङ्गार्ड, लुका सा र मासन ग्रीनवुडलगायतका खेलाडी चोटसँग जुधिरहेको छ ।

लिभरपुलमा पनि पहिलो रोजाईका गोलरक्षक एलिसन बेकर, फरवार्ड मोहम्मद सलाह र जदरान साकिरीलगायतका खेलाडी चोटसँग जुधिरहेका छन् । लिभरपुल युनाइटेडलाई पराजित गर्दै म्यानचेस्टर सिटीको १८ जितको कीर्तिमानलाई बराबरी गर्ने लक्ष्यमा हुनेछ ।

अपराजित रहेको लिभरपुल ८ खेलबाट २४ अंक जोडेर शीर्षस्थानमा रहेको छ । युनाइटेड ८ खेलबाट ९ अंक जोडेर १२औं स्थनमा छ । सिटीले १६ अंक जोडेर लिभरपुललाई पछ्याइरहेको छ ।