एजेन्सी – पोर्चुगलमा अर्काे हुने युरोकपमा स्थान पक्का गरिसकेको इटालीले युरोकप छनोटमा लेचेस्टाइनमाथि प्रभावशाली जित निकालेको छ । मंगलबार राति भएको खेलमा इटालीले घरेलु टोलीमाथि ५–० को प्रभावशाली जित निकालेको हो ।

इटालीको फराकिलो जितमा एन्ड्रिय बेलोटीले दुई तथा फेडरिको बर्नारडेस्ची, एलेसियो रोमागनोली र स्टेफन अल सरावेले गोल गरे । एकपक्षीय बनेको खेलमा इटालीले पहिलो हाफमा १–० को अग्रता लिएपनि दोस्रो हाफमा ४ गोल थप्न सफल भएको थियो । खेलको दोस्रो मिनेटमा फेडरिकोको गोलबाट इटाली खेलमा अघि बढेको थियो ।

इटालीले दोस्रो गोलको लागि ७०औं मिनेट कुर्नुपरेको थियो । एन्ड्रियले गोल गरे । ७७औं मिनेटमा एलेसियो रोमागनोलीले गोल गरेपछि इटालीले खेलमा ३–० को अग्रता लियो । ८२औं मिनेटमा स्टेफन अल सरावेले गोल गरेपछि इटालीले खेलमा ४–० को आरामदायी अग्रता लिदै सहज जिततर्फ अग्रसर बन्यो । इन्ज्युरी समयको थप गरिएको दोस्रो मिनेटमा एन्ड्रिउ बेलोटीले व्यक्तिगत दोस्रो गोल गर्दै इटालीलाई ५–० को फराकिलो जित दिलाए ।

जितसँगै समूह ‘जे’ मा इटाली अपराजित रहँदै ८ खेलबाट २४ अंक जोडेर शीर्षस्थानमा रहेको छ । लिचेस्टाइन २ अंक जोडेर पुछारमा छ ।
यही समूहको अर्काे खेलमा फिनल्यान्डले अर्मेनियामाथि ३–० को सहज जित निकाल्दै छनोट हुने सम्भावना बलियो बनाएको छ । फिनल्यान्डको ८ खेलबाट १५ अंक छ । अर्मेनिया १० अंक जोडेर तेस्रो स्थानमा छ । फिनल्यान्डको जितमा टिमु पुकीले दुई तथा फेडरिक जेन्सेनले एक गोल गरे ।

अर्काे खेलमा ग्रीसले बोस्निया हर्ज गोभिनालाई २–१ ले पराजित गरेको छ । ग्रीसको ८ अंक छ । बोस्निया हर्ज गोभिनाको १० अंक छ ।