एजेन्सी – कतार विश्वकप अन्तरगतको एसिया क्षेत्रको दोस्रो चरणको छनोट खेलमा एसियाली पावरहाउस अष्ट्रेलियाले चाइनिज ताइपेइमाथि फराकिलो जित निकालेको छ ।

अष्ट्रेलियाले ताइपेइलाई उसकै मैदानमा ७–१ को फराकिलो जित निकालेको हो । अष्ट्रेलियाको फराकिलो जितमा एडम ट्यागगार्ट, ज्याक्सन इरभिन र ह्यारी साउटरले समान २–२ तथा जेमी म्याकलरेमले एक गोल गरे । ताइपेइका यि विइ चेनले सान्त्वना गोल फर्काए ।

अष्ट्रेलियाले खेलको १२औं मिनेटमा एडम ट्यागगार्टको गोलबाट खेलमा शुरुवाती अग्रता बनाएको थियो । १९औं मिनेटमा एडमले नै अष्ट्रेलियाको अग्रता दोब्बर पा¥यो । २१औं मिनेटमा यि विइ चेनले गोल गर्दै गोल अन्तर २–१ मा ल्याएका थिए ।

३४औं मिनेटमा ज्याक्सन इरभिनले गोल गर्दै अष्ट्रेलियालाई खेलमा ३–१ को अग्रता दिलाए । त्यसको दुई मिनेटपछि नै ज्याक्सन इरभिनले व्यक्तिगत दोस्रो गोल गर्दा अष्ट्रेलिया पहिलो हाफमा ४–१ को आरामदायी स्थितिमा पुगेको थियो ।

अष्ट्रेलियाले दोस्रो हाफमा थप तीन गोल गर्न सफल भयो । ७३औं मिनेटमा ह्यारी साउटरले गोल थपे । ८४आं मिनेटमा जेमीले गोल गर्दै अष्ट्रेलियालाई फराकिलो जिततर्फ अग्रसर गराए । ८८औं मिनेटमा ह्यारी साउटरले गोल गर्दै अष्ट्रेलियालाई ७–१ को फराकिलो जित दिलाए ।

जितसँगै अपराजित रहेको अष्ट्रेलिया ३ खेलबाट ९ अंक जोडेर समूह ‘बी’ मा शीर्षस्थानमा रहेको छ । ताइपेइ ३ खेलबाट अंक विहीन हुदै पुछारमा छ ।