एजेन्सी – फ्रेन्च लिग वान क्लब पेरिस सेन्ट जर्मेन (पीएसजी) तथा ब्राजिलियन स्टार फरवार्ड नेयमार फेरि घाइते भएका छन् ।

नाइजेरियाविरुद्धको अन्तर्राष्ट्रिय मैत्रीपुर्ण खेल दौरान नेयमारले आइतबार साँझ बाया खुट्टामा ह्यामस्ट्रिङ चोट बोकेका थिए । सिंगापुरमा आइतबार साँझ १–१ को बराबरी भएको खेलमा नेयमार खेलको १२औं मिनेटमा चोट बोक्दै मैदानबाट बाहिरिएका थिए ।

नेयमार कम्तीमा पनि चार साता बाहिर रहने पीएसजीले पुष्टि गरेको छ । ‘उनको सोमबार राति एमआरआई गरेका थियौं । बाया खुट्टामा दोस्रो ग्रेडको चोट छ । उनलाई खेलमा फर्कन कम्तीमा पनि चार साता लाग्ने छ ।’ क्लबले जारी गरेको विज्ञप्तिमा उल्लेख छ । उनले कम्तीमा पनि ६ खेल गुमाउनेछ । जसमा चार फ्रेन्च लिग र दुई च्याम्पियन्स लिग रहेका छन् ।

अघिल्लो सिजन नेयमारले चोटकै कारण पीएसजीका लागि २७ खेल गुमाएका थिए । नेयमारले चोट बोकेसँगै पीएसजी थप समस्यामा परेको छ । केलियन एमबाप्पे र एडिन्सन काभनी चोटबाट फर्कने प्रयासमा छन् । जुलियन ड्राक्सलर र थियो केरहर प्रशिक्षणमा जोडिएका छन् ।

चोट र आन्तरिक कारण नेयमारले नयाँ सिजनको लिग वानको सुरुवाती तीन खेल गुमाएका थिए । त्यसपछि लगातार पाँच खेलमा मौका पाएका नेयमारले ४ गोल र एक असिस्ट दिएका थिए ।