एजेन्सी – आधुनिक फुटबलका हस्ती पोर्चुगिज सुपरस्टार फरवार्ड क्रिस्टियानो रोनाल्डोले करियरको ७ सय गोल पुरा गरेका छन् । सोमबार राति युरोकप छनोट अन्तर्गत युक्रेनविरुद्व २–१ ले पराजित भएको खेलमा ३४ वर्षे कप्तान रोनाल्डोले पेनाल्टीमार्फत करियरको ७ सय गोल पुरा गरेका हुन् ।

रोनाल्डोले आफ्नो ९ सय ७३ खेलमा ७०० गोलको आँकडा भेट्टाउदै लेजेन्ड खेलाडीको सुचीमा अटाएका छन् । उनी करियरमा सर्वाधिक गोल गर्ने छैटौ खेलाडी बनेका छन् ।

उनी लेजेन्डहरु जोसेफ बिकान, रोमारियो, पेले, फेरेन्क पुस्कास र गर्ड मुलरसँगै ७०० गोलको क्लबमा जोडिएका हुन् । रोनाल्डो चेक रिपब्लिकका जोसेफ बिकान (८०५), ब्राजिलका रोमारियो (७७२), पेले (७६७), हंगेरीका लिजेण्ड फेरेन्क पुस्कास (७४६) र जर्मनीका गर्ड मुलर (७३५) गोलभन्दा मात्रै पछि छ ।

पोर्चुगलका सर्वाधिक गोलकर्ता समेत रहेका रोनाल्डोले १६२ खेलमा ९५औं गोल गरेका छन् । राष्ट्रका लागि गोल गर्नेमा उनी इरानी फरवार्ड अली दाई (१०९) भन्दा मात्रै पछि छ ।

रोनाल्डोको ७०० गोलको आँकडा
स्पोर्टिङ लिस्वन (२००२–२००३) – ३१ खेलमा ५ गोल
म्यानचेस्टर युनाइटेड (२००३–२००९) – २९२ खेलमा ११८ गोल
रियाल म्याड्रिड (२००९–२०१८) – ४३८ खेलमा ४५० गोल
युभेन्टस् (२०१८– हालसम्म) – ५१ खेलमा ३२ गोल
पोर्चुगल २००३–हालसम्म) १६२ खेलमा ९५ गोल