एजेन्सी – स्पेनका कप्तान सर्जियो रामोस स्पेनको राष्ट्रिय टोलीबाट सर्वाधिक क्याप जित्ने खेलाडी बनेका छन् । शनिबार राति युरो कप छनोट अन्तरगत नर्वेसँगको खेलपछि रामोसले स्पेनिस फुटबल इतिहासमा  सर्वाधिक खेल खेल्ने इतिहास रचे ।

रामोसले स्पेनकै पुर्व कप्तान तथा भेट्रान गोलरक्षक इकर कासियासको कीर्तिमानलाई भंग गरेका हुन् । रामोसले स्पेनबाट १  सय ६८ क्याप पुरा गरे । रामोसले यसअघि १ सय ६७ क्याप जित्दै कासियाससँगको कीर्तिमान बराबरी गरेका थिए । यस्तै उनले लात्भियाका पुर्व मिडफिल्डर भिटालजिस एस्ताफजिभ्सलाई समेत पछि पारे । भिटालजिसले (१९९२–२०१०) सम्म लात्भियाबाट १ सय६७ क्याप जितेका थिए ।

स्पेनिस महारथी रियाल म्याड्रिडका समेत कप्तान रहेका ३३ बर्षिया स्टार डिफेन्डर रामोसले २००५ मार्च २६  मा चीनविरुद्ध खेल्दै स्पेनिस राष्ट्रिय टोलीबाट डेब्यु गरेका थिए । उनले स्पेनको स्वर्णिय युगको समय (२००८–२०१२) सम्म एक विश्वकप र दुई युरो कपको उपाधि उचालेका थिए ।

रामोसले अब इजिप्टका मिडफिल्डर अहमेद हसनको १ सय ८४ क्यापलाई पछ्याएका छन् । हसनले (१९९५–२०१२) सम्म खेल्दै यो कीर्तिमान तय गरेका थिए ।

कीर्तिमानी क्याप पुरा गरेपछि रामोसले सबै ब्यक्तिगत कुराहरु दोस्रो प्राथमिकताको बिषय रहेको र यो धेरै बर्ष गर्व गर्ने बिषय बनेर बस्ने बताएका छन् ।