एजेन्सी – रियल म्याड्रिड सुपर स्टार करिम बेन्जिमाले अन्तर्राष्ट्रिय विश्राम पछिका कठिन खेलका लागि टोली तयार रहेको बताएका छन् । अन्तर्राष्ट्रिय विश्राम पछि रियलले तीन खेलमा मालोर्का, बार्सिलोना र गालातासारेको सामना गर्नेछ ।

रियल जारी ला लिगाको ८ खेल सकिदा १८ अंकसहित शीर्ष स्थानमा रहेको छ । एल क्लासिकोको नाममा परिचित रियल र बार्सिलोनाको खेल ला लिगाको सबैभन्दा उत्सुकताका साथ प्रतिक्षा गरिने खेल हो ।

ला लिगामा बार्सिलानालाई रियलका लागि सबै भन्दा कठिन प्रतिद्वन्द्वि हो । बेन्जिमाले आउने खेल जित्न कठिन हुने भएपनि सबै चुनौतिको सामना गर्नका लागि टोलीको मनोबल उच्च रहेको बताएका छन् ।
‘हामीलाई थाहा छ । मालोर्कामा जित्न सहज हुन्न । त्यो खेल हाम्रो लागि महत्वपूर्ण छ किनकी त्यसपछि हामीले च्याम्पियन्स लिग खेल्नुपर्नेछ ,’ उनले भने, ‘मलाई लाग्छ आउने तीन खेल हाम्रो लागि कठिन छन् । तर हामी त्यसका लागि तयार छौं ।’

फ्रान्सेली फरवार्ड यो सिजन निकै फर्ममा देखिएका छन् । ला लिगका ७ खेलमा उनले ६ गोल गरिसकेका छन् । अर्को गोलका लागि एसिस्ट गरेका छन् । उनको प्रदर्शनमा पनि निरन्तरता रहँदै आएको छ ।

त्यसैले उनी सेप्टेम्बरका लागि माहाउ प्लेयर अफ दी मन्थ चुनिएका थिए । समर्थकको मतका आधारमा उनले अवार्ड जितेका हुन् । अवार्ड ग्रहण गर्ने क्रममा खुसी व्यक्त गर्दै बेन्जिमाले त्यसको श्रेय टोलीका अन्य सदस्यलाई दिए ।

‘अवार्ड जित्दा खुसी लाग्छ । टोलीका कारण यो सम्भव भएको हो,’ उनले थपे, ‘विस्तारै विस्तारै हामीले माथिल्लो स्तरमा पुग्ने कोशिस गरिरहेका छौं । हामी अब सबै खेल जितने अवस्थामा छौं ।’