मासाचुसेट (एजेन्सी) – विवादास्पद निर्णयसँगै ब्राजिल आइतबार कोपा अमेरिका सेन्टेनारियाको समूह चरणबाटै बाहिरिएको छ । आइतबार पेरुसँग १–० ले पराजित भएपछि ब्राजिल अमेरिकामा जारी कोपाको पहिलो चरणबाट बाहिरिएको हो । राउल रुडिजको विवादस्पद गोलका कारण पाँच पटकको विश्वकप विजेता ब्राजिल समूह चरणबाटै निराश भएर फर्कन परेको हहो । सन् १९८७ यता ब्राजिल पहिलो पटक समूह चरणबाटै बाहिरिएको छ ।

हातले गोल गरेको इसारा गर्दै ब्राजिलका गोलकिपर ।

समूह बीबाट बाट अघि बढ्न ब्राजिललाई बराबरी र पुरुलाई जितको आवश्यकता थियो । तर खेल सकिन १५ मिनेट बाँकी रहँदा रुडिजले गोलको खाता खोलेका थिए । टिभि रिप्लेमा भने उनले हातले गोल गरेको प्रष्ट देखिन्थ्यो । एन्डी पोलको क्रसमा विपक्षी गोलकिपर लडेपछि अघि बढेका रुडिजले हातले गोल गरेका थिए । गोलपछि उनले हात झट्कालेको टिभि रिप्लेमा प्रष्टसँगै देखिन्थ्यो । झन्डै ५ मिनेटको परामर्शपछि उरुग्वेका रेफ्री आन्दे्रस चुनाले रुडिजको गोललाई मान्यता दिएका थिए ।
जितपछि पेरु ७ अंकसहित समूहको विजेताका रुपमा अन्तिम आठमा प्रवेश गरेको छ । समूहको अर्को खेलमा इक्वेडरले हाइटीलाई ४–० ले हराएको छ । इक्वेडर (५) समूहको उपविजेताका रुपमा अन्तिम आठमा पुग्यो । ४ अंक जोडेको ब्राजिल पेरुसँगको हारपछि घर फर्केने छ । हाइटी (०) यसअघि नै प्रतियोगिताबाट बाहिरिसकेको थियो  । ११ औं मिनेटमा इनेर भ्यालेन्सियाको गोलबाट अग्रता लिएको इक्वडेरका लागि जाइमी ओएभीले २० औं मिनेटमा गोल गरे । क्रिस्टियान नोबाले ५७ औं र एन्टोनियो भ्यालेन्सियाले ७८ औं मिनेटमा चौथो गोल गरे । क्वार्टरफाइनलमा इक्वेडरले जुन १६ मा आयोजक अमेरिका र पेरुले जुन १७ मा कोलम्बियासँग प्रतिस्पर्धा गर्नेछ् ।