एजेन्सी – युरो छनोटमा विश्वविजेता फ्रान्सले कठिन जित निकालेको छ । विश्वविजेता फ्रान्सले आइसल्यान्डमाथि उसकै मैदानमा १–० को झिनो जित निकालेको हो ।

फ्रान्सको कठिन जितमा ओलिभर जिरुउडले दोस्रो हाफमा गरेको गोल नै निर्णायक बन्यो । घरेलु टोलीलाई लगातार दवावमा राखेपनि फ्रान्सले गोलका लागि निकै संघर्ष गर्नुपरेको थियो ।

आइसल्यान्ड अक्टोवर २०१८ मा स्वीट्जरल्यान्डसँग पराजित भएयता पछिल्ला ३ खेलमा घरेलु मैदानमा पराजित भएको थिएन । यसक्रममा आइसल्यान्डले अल्वानिया, टर्की र माल्दोभालाई पराजित गरेको थियो । तर, यसपटक त्यस्तो हुन सकेन ।

फ्रान्सले पहिलो आक्रमण ४१औं मिनेटमा बुनेको थियो । बेन्जामिन पाभार्डको प्रहार आइसल्यान्डका गोलरक्षक हानिस थोर हल्डरसनले बचाएका थिए । लगत्तै एन्टोइन ग्रिजमनले सुन्दर मौका खेर फाल्दा फ्रान्स अग्रता लिनबाट चुकेको थियो ।

५४औं मिनेटमा ओलिभर जिरुउडले मौका खेर फाले । ६४औं मिनेटमा ग्रिजमनलाई स्कुलासनले पेनाल्टी बक्सिमा फल गरेपछि फ्रान्सले पेनाल्टीको मौका पायो । जसलाई जिरुउडले सदुपयोग गरे ।

७८औं मिनेटमा ब्लेइस म्याथुइडीको प्रहार पोस्टमा लागेर फर्कदा फ्रान्सले अग्रता दोब्बर बनाउनबाट चुक्यो । ८१औं मिनेटमा गोलरक्षक हानिस थोर हल्डरसनले बचाए । त्यसपछि थप गोल निस्कन नसक्दा जिरुउडको गोल नै निर्णायक बन्यो ।

जितसँगै फ्रान्सले समूह ‘एच’ मा ७ खेलबाट १८ अंक जोडेर दोस्रो स्थानमा उक्लिएको छ । टर्कीसँग समान १८ अंक रहेपनि फ्रान्स गोल अन्तरमा दोस्रो स्थानमा रहेको छ । पराजित आइसल्यान्ड १२ अंक जोडेर तेस्रो स्थानमा छ । अल्वानियाको ९, एन्डोराको ३ र माल्दोभाको पनि ३ अंक रहेको छ ।

यही समूहको खेलमा टर्कीले अल्वानियालाई तथा एन्डोराले माल्दोभालाई समान १–० ले पराजित गरेको छ ।