एजेन्सी – स्पेनिस ला लिगा अन्तर्गत आइतबार क्याटलान क्लब बार्सिलोनाले सेभियाको सामना गर्दैछ । नेपाली समयअनुसार खेल सोमबार मध्यरात १२:४५ बजे सुरु हुनेछ ।

मेस्सीले च्याम्पियन्स लिगमा इन्टर मिलानविरुद्ध उत्कृष्ट प्रदर्शन गर्दै चोटबाट पुनरागमन गरेको संकेत दिइसकेका छन् । यस सिजन चोटका कारण मेस्सीले अधिकांश खेल गुमाएका छन् । अर्जेन्टिनी कप्तानले जम्मा २ सय १० मिनेट खेल्दै गोल पनि गर्न सकेका छैनन् । उनले पर्याप्त खेल समय नहुनुका बाबजुद कम समयमा नै खेलमा प्रभाव भने छोड्दै आएका छन् ।

सेभियाविरुद्ध मेस्सीको इतिहास निकै राम्रो रहेको छ । उनले ३७ खेल खेल्दै ३६ गोल गरेका छन् । यसक्रममा उनले प्रति गोलका लागि औसतमा ६१ मिनेट खर्चेका छन् । गत सिजन सेभियाको मैदानमा मेस्सीले ह्याट्रिक प्रहार गरेका थिए । त्यसपछि बार्सिलोनालाई युरोपेली सुपर कपको उपाधि जिताउन पनि मेस्सीले दुई गोल गरेका थिए ।

उनले सेभियाविरुद्ध गोल मात्र हैन महत्त्वपूर्ण समयमा निर्णायक असिस्ट पनि प्रदान गर्दै आएका छन् । उनले सन् २०१६ को कोपा डेल रे फाइनलमा जोर्डी अल्बा र नेयमारलाई असिस्ट दिएका थिए । मेस्सीले सन् २०१४ नोभेम्बरमा ह्याट्रिक गर्दै ला लिगाको शीर्ष गोलकर्ताको उपाधि पनि जितेका थिए ।

सेभियाका प्रशिक्षक जुलेन लोपेटेगुइको पनि बार्सिलोनाविरुद्ध राम्रो कीर्तिमान रहेको छैन । उनले क्याम्प नोउमा रियलविरुद्ध ५-१ को हार बेहोर्दै प्रशिक्षकको भूमिकाबाट बर्खास्त भएका थिए । मेस्सीलाई रोक्न सेभियाले निकै कडा मिहिनेत गर्नुपर्ने देखिन्छ ।