एजेन्सी– बार्सिलोनामा सुपर स्टार लियोन मेस्सीको भावनाको सम्मान हुने गर्छ । टोलीमा आउने नयाँ खेलाडीसँग उनको सम्बन्ध कस्तो रहन सक्छ भन्ने विषयमा पनि ख्याल राखिन्छ । यो सिजन उनकै चाहनामा बार्सिलोनाले नेयमारलाई भित्राउने प्रयास गरेको थियो । यद्दपी त्यो प्रयास सफल भएन ।

तर, उनलाई अर्को सिजन पनि बार्सिलोनाले फर्काउने प्रयास गर्ने बताइएको छ । दुई वर्षअघि विश्व कीर्तिमानी रकममा ब्राजिलियन स्टार बार्सिलोनाबाट पेरिस सेन्ट जर्मेन (पिएसजी) गएका थिए । बार्सिलोनाले यसपटक फ्रान्सेली स्टार एन्टोनी ग्रिजमनलाई भित्राएको थियो । तर, मेस्सीसँग उनको साझेदारी खासै जम्न नसकेको बताइन्छ ।

तर, उनीहरु दुईले सँगै धेरै खेलिसकेका भने छैनन् । १ सय ८ मिलियन पाउन्डमा बार्सिलोना पुगेयता ग्रिजमन र मेस्सीबीच कमै मात्र बोलचाल भएको छ । उनी नयाँ क्लबमा घुलमिल हुन अझै नसकेको अनुमान गरिएको छ । बार्सिलोनाले उनीहरुको सम्बन्धलाई पनि मनन गरिरहेको छ । जसका कारण बार्सिलोनाले नेयमारलाई ल्याउन पुन प्रयास गर्ने अनुमान गरिएको छ । नोउ क्याम्प पुगेयता ग्रिजमनले ३ गोल गरिसकेका छन् । उनलाई टोलीका प्रशिक्षक इर्नेस्टो भाल्भार्डेलाई प्रभाव पार्न सकेका छैनन् ।

२८ वर्षे विश्व कप विजेता ग्रिजमन पनि मेसी नहुँदा टोलीमा दबाब पर्ने च्याम्पियन्स् लिग अघिको खेलअघि बताएका थिए । यो सिजन सुरु भएयता अधिकांश समय मेस्सी चोटग्रस्त रहँदै आएका छन् । मेस्सीको टोलीका अर्का स्टार लुइस स्वारेजसँग भने सम्बन्ध सुमधुर रहँदै आएको छ । सम्बन्ध राम्रै भएका कारण मेस्सीले ठूलो रकम खर्चेर पनि नेयमारलाई लिन सुझाव दिएका थिए ।

इन्टर मिलानसँगको खेलअघि ग्रिजमनसँग मेस्सीलाई लिएर सोधिएको प्रश्नमा ग्रिजमनले भनेको थिए, ‘एकअर्कालाई जान्न त्यति सहज हुँदैन । हाम्रा बीचमा धेरै कुराकानी हुन पाएको छैन । उनी धेरै समय चोटग्रस्त रहेका छन् । जसका कारण हामीले अभ्यासमा पनि लामो समय सँगै बिताउन पाएका छैनौं ।’ त्यसका कारण पनि आउने दिनमा नेयमारलाई भित्राउनका लागि बार्सिलोनाले पुनः प्रयास गर्नेछ ।