एजेन्सी – स्पेनिस राष्ट्रिय फुटबल टोलीका प्रशिक्षक रोबर्ट मोरेनोले युरो २०२२ को छनोट अन्तर्गत नर्वे र स्विडेनविरुद्ध खेलका लागि टोली घोषणा गरेका छन् । उनले टोलीमा ३ नयाँ खेलाडीलाई मौका दिएका छन् ।

टोलीमा सर्जियो रेगुलियोन, पाउ टोरेस र जेरार्ड मोरेनो पहिलो पटक स्थान बनाउन सफल भएका छन् । मोरेनोले १६ वर्षीय बार्सिलोना सुपरस्टार अन्सु फातीलाई टोलीमा समेट्ने प्रयास गरेपनि फिफाको स्वीकृति प्राप्त नभएकाले प्रतिक्षा गर्नुपरेको हो । फातीले गत महिना स्पेनको नागरिकता लिएपनि फिफाबाट भने स्वीकृति आउन बाँकी रहेको हो ।

भिल्लारियलका लागि जारि सिजन ६ गोल गरिसकेका मोरेनोसँगै उनकै सहकर्मी डिफेन्डर पाउ टोरेस पनि टोलीमा समेटिएका हुन् । यी दुईसँगै सान्टि काजोर्लाले पनि राष्ट्रिय टोलीमा पुनरागमन गरेका छन् । उनी चोटका कारण लामो समयदेखि मैदानबाहिर रहेपनि लिगमा उत्कृष्ट पुनरागमन गरेपछि टोलीमा फर्किएका हुन् ।

युरो छनोटको समूह एफ मा स्पेनले सुरुवाती ६ खेल नै जितेको छ । स्पेनले अक्टोबर १२ मा नर्वे र अक्टोबर १५ मा स्विडेनमा हुने खेल जिते अर्को संस्करणका लागि छनोट पक्का गर्नेछ । यसअघि भएको खेलमा स्पेनले नर्वेलाई २-१ र स्विडेनलाई ३-० ले पराजित गरेको थियो ।

स्पेनको पूर्ण टोली :

गोलरक्षक : डेविड डे हेया, केपा अर्रिजाबलागा, पाउ लोपेज

डिफेन्डर : ड्यानी कर्भाजल, जेसस नाभास, सर्जियो रामोस, डिएगो लोरेन्टे, सर्जियो रेगुलियोन, राउल आल्बियोल, पाउ टोरेस, जुआन बर्नाट, इनिगो मार्टिनेज

मिडफिल्डर : रोड्री, ड्यानी सेबालोस, सान्टि काजोर्ला, पाब्लो साराबिया, सर्जियो बुस्केट्स, लुइस अल्बर्टो, थियागो आलाकान्ट्रा, साउल निगुएज, फाबियन रुइज

फरवार्ड : जेरार्ड मोरेनो, मिके ओयारजबल, रोड्रीगो मोरेनो