एजेन्सी– चेल्सीका प्रशिक्षक फ्रान्क लाम्पार्डले आफ्नो टोलीका फरवार्ड टामी अब्राहमले अन्तर्राष्ट्रिय स्तरमा पनि आफुलाई प्रमाणित गर्ने विश्वास लिएका छन् । अब्राहम दुई वर्षयता पहिलो पटक इंग्ल्यान्ड टोलीमा समावेश भएका छन् ।

चेल्सीबाट यो सिजन दमदार सुरुवात गरेका अब्राहम चेक रिपब्लिक र बुल्गेरियाविरुद्ध हुने युरोपियन छनोटका खेलमा गेराथ साउथगेटको रोजाईमा पर्न सफल भएका हुन् । २२ वर्षे फरवार्डले दुई वर्षअघि जर्मनीविरुद्ध डेब्यू गरेका थिए । डेब्यूको चार दिन पछि ब्राजिलविरुद्धको खेलमा उनी परिवर्तित खेलाडीका रुपमा मैदान प्रवेश गरेका थिए ।

बुधबार अब्राहमले च्याम्पियन्स लिगमा पहिलो गोल गरे । यो सिजनमा त्यो उनको आठौं गोल थियो । अब्राहमले यो सिजनमा गरेको सुरुवातले लाम्पार्ड उनीले आउने दिनमा अझै राम्रो गर्नेमा आशावादी छन् । ‘म एकदम खुसी छु । मलाई लाग्छ उनी राष्ट्रिय टोलीका हकदार हुन्,’ लाम्पार्डले थपे, ‘उनले हाम्रा लागि नियमित रुपमा रुपमा गोल गरिरहेका छन् । सबैलाई थाहा छ उनी राम्रो लयमा छन् । यो उनको स्वभाविक रुपमा आएको सुधार हो ।’

लाम्पार्डले अब्राहमले क्रमिक रुपमा आफ्नो प्रदर्शनमा सुधार ल्याइरहेको र गोल गरिरहेको उल्लेख गर्दै आफु उनलाई धेरै दबाब दिने पक्षमा नरहेको बताए । च्याम्पियन्स लिगमा दुई गोल गरेका अब्राहमले प्रिमियर लिगमा पनि त्यसको निरन्तरता दिनेमा लाम्पार्ड विश्वस्त छन् ।

‘उनको प्रदर्शनको निरन्तरता चाहान्छु र उनीले चेल्सीका लागि बढी भन्दा बढी गोल गरुन् । त्यस्तै जब उनी इंग्ल्यान्डका लागि खेल्छन् स्वभाविक छ उनले त्यहाँ पनि गोल गर्नेछन्,’ लाम्पार्डले भने, ‘यो उनको अर्को कदम हो । मलाई विश्वास छ यो चुनौतिलाई उनले अवसरका रुपमा लिनेछन् र इल्यान्डाका लागि गोल गर्नेछन् । ‘