एजेन्सी – युवा फरवार्ड ग्याब्रियल मार्टिनेलीको दुई गोल सहयोगमा इंग्लिस क्लब आर्सनलले युरोपा लिग फुटबलमा प्रभावशाली जित दर्ता गरेको छ ।

घरेलु मैदानमा बिहीबार राति भएको खेलमा आर्सनलले बेल्जियन क्लब स्टान्डर्ड लिएगमाथि ४–० को प्रभावशाली जित निकालेको हो । आर्सनलको जितमा १८ वर्षीय मार्टिनेलीले दुई गोल गर्नुका साथै एक गोललको लागि असिस्ट गरे । जोसेफ विललक र ड्यानियल सेवालसले समान १–१ गोल गरे ।

शुरुवाती २२ मिनेटभित्र आर्सनलले ३–० को अग्रता लिदा मार्टिनेलीले दुई गोल गरिसकेको थियो । खेलको १४औं मिनेटमा मार्टिनेलीले किरन टायरनेका पासमा गोल गर्दै घरेलु टोलीलाई अग्रता दिलाए । त्यसको दुई मिनटपछि नै मार्टिनेलीले व्यक्तिगत दोस्रो गोल गरे । यसपटक मार्टिनेलीले रेइस नेल्सनको पासमा गोल गरेका थिए ।

२२औं मिनेटमा जोसेफ विललकले गोल गर्दा आसर्नल खेलमा ३–० ले अघि बढ्यो । ५७औं मिनेटमा मार्टिनेलीको पासमा ड्यानियल सेवालसले गोल गर्दै आर्सनललाई ४–० को प्रभावशाली जित दिलाए ।

जितसँगै आर्सनल समुह ‘एफ’ मा २ खेलबाट ६ अंक जोडेर शीर्षस्थानमा रहेको छ । स्टान्डर्ड ३ अंकसहति तेस्रो स्थानमा छ । यही समूहको अर्काे खेलमा जर्मन क्लब फ्रान्कफर्टले पोर्चुगलको भिक्टोरिया डि गुइमारेसलाई उसकै मैदानमा १–० ले पराजित गरेको छ । जितसँगै फ्रान्कफर्ट २ खेलबाट ३ अंकसहति दोस्रो स्थानमा उक्लिएको छ । गुइमारेस अंकविहीन हुदै पुछारमा छ ।