एजेन्सी – फरवार्ड मोहम्मद सलाह चम्किएपछि साविकको विजेता इंग्लिस क्लब लिभरपुलले युइएफए च्याम्पियन्स लिग फुटबलमा अष्ट्रियन क्लब साल्र्जवर्गमाथि सघर्षपुर्ण जित निकालेको छ ।

घरेलु मैदान एनफिल्डमा एक समय ३–० को आरामदायी अग्रता लिएरपनि लिभरपुलले ४–३ को संघर्षपुर्ण जित निकालेको हो । लिभरपुलको जितमा मोहम्मद सलाहले दुई तथा एन्ड्रिउ रोबर्टसन र साडियो मानेले गोल गरे । साल्जवर्गका हे चान ह्वाङ, ताकुमी मिनामिमो र अर्लिङ ब्राउट हल्यान्डले गोल गरे ।

खेलको नवौं मिनेटमा रोवर्टाे फिर्मिनोको पासमा साडियो मानेको गोलबाट लिभरपुलले खेलमा  अग्रता लिएको थियो । २५औं मिनेटमा एन्ड्रिउ रोबर्टसनले एलेक्ससान्दर अर्नाेल्डको पासमा गोल गर्दै लिभरपुलको अग्रता दोब्बर बनाए । ३६औं मिनेटमा फिर्मिनोको पासमा मोहम्मद सलाहले गोल गरेपछि लिभरपुलले साल्जवर्गविरुद्ध ३–० को आरामदायी अग्रता लिन सफल भएको थियो ।

३९औं मिनेटमा हे चान ह्वाङले गोल गरेपछि पहिलो हाफ ३–१ को अवस्थामा सकिएको थियो । ५६औं मिनेटमा ताकुमी मिनामिनाले गोल गर्दै पाहुना टोलीलाई ३–२ को अवस्थामा ल्याए । ६०औं मिनेटमा अर्लिङ ब्राउटले गोल गर्दै साल्जवर्गलाई ३–३ गोलको बराबरीमा ल्याए ।

६९औं मिनेटमा सलाहले फिर्मिनोको पासमा व्यक्तिगत दोस्रो तथा टिमका लागि चौथो गोल गर्दै लिभरपुललाई ४–३ ले अघि बढाए । त्यसपछि थप गोल निस्कन नसक्दा लिभरपुलले जितसहित महत्वपुर्ण ३ अंक जोड्न सफल भयो ।

संघर्षपुर्ण जितसँगै लिभरपुलले समूह ‘ई’ मा पहिलो जित निकाल्दै ३ अंक जोडेर दोस्रो स्थानमा उक्लिएको छ । ३ अंकसहित साल्जवर्ग तेस्रो स्थानमा छ ।

यही समूहको अर्को खेलमा इटालियन क्लब नेपोली र बेल्जियन क्लब जिन्कले गोलरहित बराबरी खेल्दै अंक बाँडे । ४ अंकसहित नेपोली शीर्षस्थानमा रहँदा जिन्क १ अंकसहित पुछारमा छ ।