एजेन्सी – इंग्लिस क्लब म्यानचेस्टर सिटीले युइएफए च्याम्पियन्स लिग फुटबलमा आफ्नो दोस्रो खेलमा क्रोएसियन क्लब डाइनामो जाग्रिवमाथि सहज जित निकालेको छ ।

घरेलु मैदान इतिहाद स्टेडियममा मंगलबार राति भएको खेलमा सिटीले जाग्रिवमाथि २–० को सहज जित निकालेको हो । सिटीको जितमा रहिम स्ट्रलिङ र फिल फोडेनले गोल गरे ।

पाहुना टोलीले घरेलु टोलीलाई पहिलो हाफमा बराबरीमा रोकेपनि दोस्रो हाफमा रोक्न सकेन । ६६औं मिनेटमा रहिमले रियाद महारेजको पासमा गोल गर्दै सिटीलाई १–० को अग्रता दिलाए । इन्ज्युरी समयको थप गरिएको पाँचौ मिनेटमा फिल फोडेनले गोल गर्दै सिटीलाई २–० को जित दिलाए ।

जितसँगै समुह ‘सी’ मा अपराजित रहेको सिटीले दुई खेलबाट ६ अंक जोडेर शीर्षस्थानमा रहेको छ । पराजित डाइनामो जाग्रिव ३ अंकसहित दोस्रो स्थानमा छ ।

यही समूहको अर्काे खेलमा युक्रेनी क्लब साख्तर डोनेस्कले इटालियन क्लब एटलान्टामाथि २–१ को कठिन जित निकालेको छ । साख्तरले खेलमा पछि परेको स्थिति उल्ट्याएर जित निकालेको हो ।

घरेलु टोलीले खेलको १६औं मिनेटमा पाएको पेनाल्टीलाई सदुपयोग गर्न सकेन । तर, त्यसको दुई मिनेटपछि डुभाज जापाटाले गोल गर्दै घरेलु टोलीलाई अग्रता दिलाएका थिए ।

४१औं मिनेटमा जुनियर मोरायसले बराबरी गोल फर्काए । बराबरीतर्फ धकेलिएको खेलको इन्ज्युरी समयको थप गरिएको पाँचौ मिनेटमा मनोर सोलोमोनले गोल गर्दै साख्तरलाई २–१ को महत्वपुर्ण जित दिलाए । जितसँगै साख्तर २ खेलबाट ३ अंक जोडेर तेस्रो स्थानमा रहेको छ । एटलान्टा अंकविहीन छ ।