काठमाडौं (हाम्रो खेलकुद) – नेपाली राष्ट्रिय फुटबल टोलीले फिफा विश्वकप २०२२ कतारको दोस्रो चरण छनोटअन्तर्गत समूह चरणको तेस्रो खेलमा अष्ट्रेलियाको सामना गर्दैछ । असोज २३ गते हुने खेलका लागि प्रशिक्षक योहान कालिनले पछिल्लो खेलबाट २ खेलाडी परिवर्तन गरेका छन् ।

चोटका कारण चाइनिज ताइपेइविरुद्ध खेल गुमाएका अजित भण्डारी र फरवार्ड नवयुग श्रेष्ठ टोलीमा फर्किएका छन् । यसअघि पहिलो खेलमा कुवेतविरुद्धको २३ खेलाडी नै अष्ट्रेलिया प्रस्थान गर्नेछन् । ताइपेइविरुद्ध विमल राना र रवी सिलवाल प्रस्थान गर्ने भनेपनि रवी भिसा नआएका कारण नेपालमा नै रहेका थिए । यसपटक प्रशिक्षक कालिनले कप्तान विराज महर्जन, भरत खवास लगायत खेलाडीलाई प्रशिक्षणमा नै समावेश गरेका थिएनन् ।

नेपालले असोज २३ मा अष्ट्रेलियासँग खेलेपछि चौथो तथा अन्तिम अवे खेलमा असोज २८ गते जोर्डनको सामना गर्नेछ । जोर्डनविरुद्ध खेलका लागि पनि सम्भवत यहि नै अन्तिम टोली हुनेछ । टोली अष्ट्रेलियाबाट नै जोर्डन प्रस्थान गर्ने कार्यक्रम रहेको छ । नेपाली टोली बुधबार अष्ट्रेलिया प्रस्थान गर्ने कार्यक्रम छ । टोलीले एक साता सिड्नीमा रहेर प्रशिक्षण गर्नेछ । खेलको दुई दिनअघि मात्र टोली खेलस्थल क्यानबेरा प्रस्थान गर्नेछ । सिड्नीमा नेपाली टोलीको व्यवस्थापन अष्ट्रेलिया नेपाल फुटबल संघले गरेको छ ।

नेपालले छनोटको पहिलो खेलमा कुवेतसँग ७-० को लज्जास्पद हार बेहोरेपछि दोस्रो खेलमा ताइपेइलाई उसकै मैदानमा २-० ले पराजित गरेको थियो । उक्त खेलमा नेपालका लागि दुवै गोल अन्जन विष्टले गरेका थिए । नेपालले यी २ खेलपछि छनोटमा बाँकी रहेका चारै खेल घरेलु मैदानमा खेल्ने कार्यक्रम रहेको छ ।

नेपाली टोली :

गोलकिपर – किरण चेम्जोङ (कप्तान), विकेश कुथु, विशाल श्रेष्ठ

डिफेन्स – सरोज दाहाल, अजित भण्डारी, दीनेश राजवंशी, अनन्त तामाङ, देवेन्द्र तामाङ, रजिन धिमाल, सुमन अर्याल

मिडफिल्ड – रोहित चन्द, सुनिल बल, रवि पासवान, अन्जन विष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ, विशाल राई

फरवार्ड – विमल घर्तीमगर, अभिषेक रिजाल, नवयुग श्रेष्ठ