काठमाडौं (हाम्रो खेलकुद)– अस्ट्रेलियासँग विश्व कप छनोट खेल्नु एक साताअघि नै नेपाली राष्ट्रिय फुटबल टोली त्यहाँ पुग्ने भएको छ । नेपाली टोली बुधबार अस्ट्रेलिया जाने तयारीमा रहेको व्यवस्थापक मधुसुदन उपाध्यायले जानकारी दिए । यद्दपी टोलीको भिसा भने आउन बाँकी रहेको बताइएको छ । मंगलबार भिसा आउने अपेक्षा गरिएको छ र त्यसअनुसार नै टोलीको बिदाइ कार्यक्रम पनि रहेको छ ।

नेपाली टोलीले सिड्नीस्थित प्राइभेट फुटबल एकेडेमीमा केहि दिन प्रशिक्षण गर्ने कार्यक्रम रहेको छ । असोज २३ गते नेपाल र अस्ट्रेलियाबीच प्रतिस्पर्धा हुनेछ । क्यानबेरामा हुने खेलका लागि नेपाली दुई दुई दिनअघि सिड्नीबाट त्यसतर्फ जाने उपाध्यायले बताए । सिड्नीमा अस्ट्रेलियन नेपाली फुटबल संघको व्यवस्थापनमा नेपाली टोली बस्नेछ । अस्ट्रेलियासँग खेलको भोलिपल्ट असोज २४ गते नेपाली टोली जोर्डन प्रस्थान गर्नेछ । नेपाल र जोडर्नबीच असोज २८ गते खेल हुनेछ । त्यसपछि नेपाली टोली स्वदेश फर्कनेछ ।

प्रशिक्षक योहान कालिनले यसपटक टोलीमा धेरै हेरफेर गर्ने छैनन् । उनले प्रशिक्षणमा पनि जम्मा २६ खेलाडीलाई संलग्न गराएका छन् । त्यसमध्य ३ खेलाडी विदेशमा रहेर खेलेका छन् । गोलरक्षक किरण चेम्जोङसँगै विमल घर्तिमगर र रोहित चन्द प्रशिक्षणमा सामेल छैनन् । प्रशिक्षक कालिनले विराज महर्जन, भरत खवास लगायत पछिल्लो पटक छनोटबाट बाहिरिएका खेलाडीलाई फिर्ता बोलाएका थिएनन् । पछिल्लो खेल गुमाएका अजित भण्डारी र नवयुग श्रेष्ठ टोलीमा फर्किएका छन् र सम्भवत: अष्ट्रेलिया प्रस्थान गर्ने टोलीमा सामेल हुनेछन् ।

एसियाको विश्व कप छनोटको समूह बीमा ५ मध्ये ४ टोली कुवेत, अस्ट्रेलिया, जोर्डन र नेपालको समान ३ अंक छ भने चाइनिज ताइपेइ अंक विहिन छ । गत महिना पहिलो खेलमा कुवेतसँग ७–० को लज्जास्पद हार बेहोरेको नेपालले अर्को खेलमा चाइनिज ताइपेलाई २–० ले उसैको मैदानमा हराएको थियो ।

चाइनिज ताइपे पहिलो खेलमा जोर्डनसँग २–१ ले पराजित भएको थियो । त्यस्तै अस्ट्रेलियाले कुवेतलाई ३–० ले हराएको थियो । अस्ट्रेलिया र जोर्डनले १ खेले खेलका छन् भने बाँकी ३ टोलीले समान २ खेल खेलिसकेका छन् ।