एजेन्सी – स्पेनिस ला लिगा अन्तर्गत शनिबार हुने खेलमा लिगको शीर्षस्थानमा रहेको रियल म्याड्रिडले पछिल्लो समय केहि खराब प्रदर्शन गरिरहेको एटलेटिको म्याड्रिडको सामना गर्दैछ । खेल नेपाली समयअनुसार भने आइतबार विहान १२:४५ बजे सुरु हुनेछ ।

खेलको पूर्वसन्ध्यामा आयोजित पत्रकार सम्मेलनमा बोल्दै रियल म्याड्रिडका प्रशिक्षक जिनेदिन जिदानले खेलको निकै महत्त्व रहेको बताए । ‘हामीसँग खेलाडी र प्रशिक्षकको भूमिकामा निकै ठूलो जिम्मेवारी छ । हामीले के गर्नुपर्छ बुझेका छौं,’ उनले थपे, ‘ यो मात्र अर्को लिग खेल हो र हामीले अन्य खेलझैं जितकै लक्ष्य राखेर खेल्नेछौं । खेल पक्कै सहज हुने छैन किनकी एटलेटिको राम्रो टोली हो ।’

जिदानले गोलरक्षक थिबाउट कोर्टुवाको स्थितिलाई लिएर भने प्रष्ट जवाफ दिएनन् । पछिल्लो खेलमा केहि खराब लयमा रहेका कोर्टुवालाई विश्राम दिँदा अर्का गोलरक्षक एल्फोन्स आरिओलाले राम्रो प्रदर्शन गरेका थिए । जिदानले अहिले नै गोलरक्षकबारे निर्णय नलिएको बताए । ‘मेरो लागि टोलीका सबै खेलाडी उत्तिकै महत्त्वपूर्ण छन् । सबै खेलाडी खेलका लागि तयार छन् । मैले चाहेअनुसार भए त २५ खेलाडी नै खेलाउथें,’ उनले भने ।

जिदानले पछिल्लो खेलमा बेन्चबाट आएर गोल गरेका ब्राजिलियन फरवार्ड रोड्रीगो गोएसलाई पहिलो टोलीमा नराखेको बताए । उनले म्याड्रिडको दोस्रो रोजाई टोली कास्तीलाबाट खेल्ने भएका छन् । ‘हामी उनलाई लिएर फरक योजनामा छौं । उनले भोली कास्तीला टोलीबाट खेल्नेछन् र त्यसमा परिवर्तन हुने छैन । उनी हाम्रो सिनियर टोलीका सदस्य हुन् र उनलाई लिएर योजना बनाएका छौं । हामीले उनलाई उनको भूमिकाबारे प्रष्ट पारेका छौं,’ उनले थपे ।

लिगको शीर्षस्थानमा रहेको रियललाई अब त्यसै स्थानमा जारि राख्न रियलले प्रयास गर्ने जिदानले बताए । ‘हामीले संयम भएर खेल्नुपर्छ । एटलेटिको बलियो टोली हो । तर म विपक्षी भन्दापनि आफ्नो टोलीमै ध्यान दिइरहेको छु । खेलाडीहरुको मनोबल उच्च छ र हामी राम्रो नतिजा ल्याउन प्रयासरत छन्,’ जिदानले भने ।