एजेन्सी – अर्जेन्टिना र बार्सिलोनाका सुपर स्टार लियोन मेस्सी गए राती फिफा द बेस्ट अवार्ड जिते । उनले लिभरपुलका भर्जिल भान डाइक र युभेन्ट्सका सुपर स्टार क्रिस्टियानो रोनाल्डोलाई पछि पार्दै अवार्ड जितेका हुन् ।

द बेस्ट अवार्ड मेस्सीले जित्नु कतिका लागि आश्चार्यजनक पनि मानिएको छ । गत महिना युईएफए उत्कृष्ट खेलाडीको अवार्ड भान डाइकले जितेकाले द बेस्ट पनि उनले जित्ने कतिपयको अपेक्षा थियो । उता मिलानमा अवार्ड समारोह चलिरहँदा रोनाल्डो भने घर मै थिए । पोर्चुगिज सुपर स्टारलाई समारोहमा नदेख्दा कतिपय आश्चार्यमा परेका थिए ।

तर, उनी चोट कारण समारोहमा सहभागित नभएको बताइएको छ । युभेन्ट्सका प्रशिक्षक माउरिजियो सारीले पनि ३४ वर्षे स्टार मंगलबार ब्रेसियाविरुद्धको खेलमा उपलब्ध नहुने बताएका छन् । ‘ रोनाल्डोको मासंपेशीमा केहि समस्या छ ,’ उनले भने,‘ म चोटका कारण कुनै जोखिम उठाउन चाहन्न ।’

अवार्ड समारोह सकिएको १० मिनेटपछि नै रोनाल्डो सामाजिक सञ्जालमा सक्रिय भएका थिए । उनले इन्स्टाग्राममा फोटो अपलोड गरेका थिए । जसमा उनी किताब पढि रहेको र उनका छोरा जुनियर क्रिस्टियानो गृहकार्य गरिरहेका देखिन्छन् । उनले तस्बिर पोस्ट गर्ने क्रममा एक संदेश पनि लेखेका छन् । उक्त संदेशले फिफाको निर्णयप्रति इंगित गरिएको भन्दै रोनाल्डोमाथि विभिन्न टिप्पणी सामाजिक संजालमा देखिएको छ ।