एजेन्सी – रियल म्याड्रिडका फरवार्ड करीम बेन्जेमाले आइतबार सेभिल्लाविरुद्ध खेलमा गोल गर्दै यस वर्ष गोल गर्ने सुचिमा बार्सिलोना कप्तान लिओनेल मेस्सीसँग बराबरी गरेका छन् ।

बेन्जेमाको एकमात्र गोलमा रियलले सेभिल्लालाई पराजित गर्दै लिगमा महत्त्वपूर्ण ३ अंक हासिल गरेको थियो । जिनेदिन जिदानका लागि पछिल्लो समय उत्कृष्ट प्रदर्शन गरिरहेका बेन्जेमाले उक्त गोलसँगै सन् २०१९ मा गोलसंख्या २० पुर्याएका छन् । उनीसँगै यस उपलब्धि हासिल गर्नेमा युरोपमा अन्य ४ खेलाडी रहेका छन् ।

मेस्सीले सिजनको सुरुवात चोटका कारण गुमाएपछि गोल गर्न सकेका छैनन् । गत साता च्याम्पियन्स लिगमा डर्टमुन्डविरुद्ध बेन्चबाट मैदान प्रवेश गरेका उनले लिगमा ग्रानडाविरुद्ध हार्दा पनि ४५ मिनेटमात्र खेले । उनले अब आउने खेलमा भने सुरुवाती रोजाईमा खेल्ने अपेक्षा गरिएको छ ।

मेस्सीभन्दा अगाडी यस सिजन म्यानचेस्टर सिटीका सर्जियो अगुएरोले २२ गोल गरेका छन् । उनी गोल गर्ने खेलाडीको शीर्षस्थानमा छन् । यसैगरी बायर्न म्युनिखका रोबर्ट लेवान्डोस्की र पेरिस सेन्ट जर्मेन (पीएसजी) का किलियन एमबाप्पे पनि २१ गोल गर्दै शीर्ष ३ मा अटाएका छन् ।

स्पेनिस ला लिगामा गोल गर्ने सुचिमा बेन्जेमा भिल्लारियका जेरार्ड मोरेनोसँगै शीर्षस्थानमा छन् । दुवै खेलाडीले ५-५ गोल गरेका छन् । युरोपमा भने लेवान्डोस्कीले ९ तथा सर्जियो अगुएरोले ८ गोल गरेका छन् ।