एजेन्सी – फरवार्ड करिम बेन्जिमाको निर्णायक गोलमा स्पेनिस महारथी रियाल म्याड्रिडले स्पेनिस ला लिगामा सेभिल्लालाई पराजित गरेको छ । रियालले सेभिल्लालाई उसकै मैदानमा १–० ले पराजित गरेको हो ।

सेभिल्लामा आइतबार राति भएको निकै नै प्रतिस्पर्धात्मक खेलमा बेन्जिमाले दोस्रो हाफमा गोल गरेको थियो । ३५औं मिनेटमा बेन्जिमाको प्रहार सेभिल्लाका गोलरक्षक थोमस भकलिकले सहजै बचाए । ३९औं मिनेटमा हामेस रोड्रिग्वेजको प्रहारलाई थोमसले नै बचाए ।

६४औं मिनेटमा ड्यानियल कार्भाहलको पासमा बेन्जिमाले गोल गर्दै रियाललाई खेलमा अग्रता दिलाए । ६९औं मिनेटमा लुकास ओकाम्पसको प्रहार क्रसबारमा लागेर फर्कदा सेभिया बराबरीबाट चुक्यो । ८८औं मिनेटमा जेभियर हर्नान्डेजले बराबरीको गोलको मौका खेर फाल्दा रियाल १–० ले विजयी हुन सफल भयो ।

यससँगै रियालले च्याम्पियन्स लिगमा फ्रेन्च क्लब पेरिस सेन्ट जर्मेन (पीएसजी) साग भोगेको नमिठो हारको मल्हम लगाएको छ ।

जितसँगै रियाल अंक तालिकामा दोस्रो स्थानमा उक्लिएको छ । शीर्षस्थानका एथ्लेटिको बिल्वाओसँग समान ११ अंक रहेपनि रियाल गोल अन्तरमा दोस्रो स्थानमा रहेको हो । सेभिल्ला १० अंकसहित पाँचौ स्थानमा छ ।

ला लिगाको अन्य खेलको नतिजा
गेटाफेविरुद्ध मलोर्का (४–२)
स्पान्योलविरुद्ध रियल सोसिडाड (१–३)
भ्यालेन्सियाविरुद्ध लेगानेस (१–१)
एथ्लेटिको बिल्वाओविरुद्ध डिर्पाेटिभो अलाभेस (२–०)