एजेन्सी – इंग्लिस प्रिमियर लिग फुटबलमा साविकको उपविजेता लिभरपुलले लन्डन क्लब चेल्सीलाई पराजित गरेको छ । लिभरपुलले चेल्सीलाई उसकै मैदानमा २–१ ले पराजित गरेको हो ।

स्टामफोर्ड ब्रिजमा आइतबार राति भएको खेलमा लिभरपुलाई जिताउन एलेसान्दर अर्नाेल्ड र रोवर्टाे फिर्मिनोले गोल गरे । घरेलु टोलीका एङ्गोलो कान्टेले एक गोल फर्काए ।

प्रतिस्पर्धात्मक बनेको खेलमा पाहुना टोलीका अर्नाेल्डले खेलको १४औं मिनेटमा गोल गरेका थिए । मोहम्मद सलाहको चलाखीपुर्ण पासमा अर्नाेल्डले गोल गर्न सफल भएका थिए । २४औं मिनेटमा टम्मी अब्राहमको प्रहारलाई लिभरपुलका गोलरक्षक एड्रियनले बचाएका थिए ।
२७औं मिनेटमा चेल्सीका कप्तान सिजरले गोल गरेपनि भिडियो एसिस्टेन्ट रेफ्री (भिएआर) को सहायतामा गोलको मान्यता पाएन ।

३०औं मिनेटमा फिर्मिनोले गोल गर्दै लिभरपुललाई पहिलो हाफमा २–० को अग्रता दिलाए । पहिलो हाफमा अन्तिम समयमा अब्राहमले बराबरी गर्ने मौका खेर फाले ।

दोस्रो हाफको शुरुमै चेल्सीका गोलरक्षक किपा अरिजाबालगाले फिर्मिनोको प्रहारलाई मुस्किलले बचाए । ५१औं मिनेटमा एलेसान्दर अर्नाेल्डको प्रहारलाई किपाले नै विफल पारिदिए ।

५९औं मिनेटमा चेल्सीका कान्टे चुके । ७१औं मिनेटमा कप्तान सेजरको पासमा कान्टेले गोल गर्दै खेललाई २–१ को अन्तरमा झारे । ८१औं मिनेटमा मासन माउन्टको प्रहारलाई लिभरपुलका गोलरक्षक एड्रियनले मुस्किलले बचाउदा चेल्सी बराबरीबाट चुक्यो । त्यसपछि थप गोल निस्कन नसक्दा लिभरपुल २–१ ले विजयी हुन सफल भयो ।

जितसँगै अपराजित रहेको लिभरपुलले ६ खेलबाट १८ अंक जोडेर शीर्षस्थानमा रहेको छ । पराजित चेल्सी ८ अंकसहित ११औं स्थानमा छ । दोस्रो स्थानको म्यानचेस्टर सिटीको १३ अंक छ ।