एजेन्सी – शुरुवाती दुई गोलको अग्रता जोगाउन नसक्दा लन्डन क्लब आर्सनल इंग्लिस प्रिमियर लिग फुटबलमा वाटफोर्डसँग बराबरी रोकिएको छ । वार्टफोर्डको घरेलु मैदानमा आइतबार राति भएको खेलमा आर्सनल २–२ गोलको बराबरीमा रोकिएको हो ।

आर्सनलका पिएरे इमरिक औवामियाङले दुवै गोल गरेका थिए । घरेलु टोलीका लागि टोम क्लेभरर्ली र रोवर्टाे पेरेराले गोल गरे । खेलको २१औं मिनेटमा सिड कोलासिनाकको पासमा औवामियाङले गोल गर्दै पाहुना टोलीलाई अघि बढाएका थिए । ३२औं मिनेटमा औवामियाङले एन्सले मेटल्यान्ड नाइल्सको पासमा गोल गर्दा आर्सनलले पहिलो हाफमै २–० को अग्रता लिएको थियो ।

तर, आर्सनलले दोस्रो हाफमा त्यो अग्रता जोगाउन सकेन । घरेलु टोलीले दोस्रो हाफमा सुधारिएको प्रदर्शन गर्दै दुई गोल गर्न सफल भएको थियो । ५३औं मिनेटमा टोमले गोल गर्दै गोलअन्तर २–१ म झारे । ८१औं मिनेटमा रोवर्टाेले पेनाल्टीमा गोल गर्दै खेललाई २–२ गोलको बराबरीमा ल्याए । डेभिड लुइजले पेरेरालाई फल गरेपछि प्राप्त पेनाल्टीमा पेरेरा आफैल गोल गरेका थिए ।

त्यसपछि थप गोल निस्कन नसक्दा आर्सनल बराबरीमा रोकियो । बराबरीसँगै आर्सनल ५ खेलबाट ८ अंक जोडेर सातौ स्थानमा छ । वाटफोर्ड २ अंक जोडेर पुछारमा छ ।

प्रिमियर लिगमै आइतबार राति बर्नमाउथले एभर्टनलाई ३–१ ले पराजित गरेको छ । बर्नमाउथको जितमा कलुम विल्सनले २ तथा रायन फ्रासरले गोल गरे । एभर्टनका डोमिनिकले एक गोल गरे । जितसँगै बर्नमाउथ ७ अंक जोडेर आठौं तथा एभर्टन ७ अंकसहित ११औं स्थानमा छ ।