काठमाडौं (हाम्रो खेलकुद)– नेपाली महिला फुटबल टोलीकी फरवार्ड सावित्रा भण्डारी सम्बा नादेझ्दा कपकी सर्वाधिक गोलकर्ता बनेकी छिन् । उज्वेकिस्तानविरुद्ध बिहीबारको फाइनलमा सावित्राले २ गोल गरेपनि नेपाल ३–२ ले पराजित भएको थियो । चार राष्ट्रको सहभागिता रहेको प्रतियोगिता राउन्ड रोविनमा पनि नेपाल उज्वेकिस्तानसँग नै पराजित भएको थियो ।

सावित्रा ७ गोल सहित नादेझ्दाकी सर्वाधिक गोलकर्ता बनेकी हुन् । उनले ४ खेलमा ७ गोल गरेकी हुन् । उनले प्रतिद्धन्द्धि तीन टोलीविरुद्ध गोल गरिन् । किर्गिस्तानविरुद्ध ८–२ को जितमा उनले ४ गोल गरेकी थिइन् । दोस्रो खेलमा नेपाल उज्वेकिस्तानसँग २–० ले पराजित भएको थियो । तेस्रो खेलमा ताजकिस्तानलाई १–० ले हराउँदा सावित्राले नै गोल गरेकी थिइन् ।

यहि प्रतियोगिताबाट सम्बाले नेपालका लागि सर्वाधिक गोल गर्ने महिला खेलाडी अनु लामाको कीर्तिमानसँग बराबर गरेकी छिन् । अनु र सावित्राको गोलसँख्या समान ३५ छ । पुरुष खेलाडीको हकमा भने अहिले महिला टोली प्रशिक्षक हरि खड्का र नीराजन रायमाझीको नाममा सर्वाधिक गोल छ । दुवैले समान १३ गोल गरेका छन् ।

सावित्रा गत चैतमा विराटनगमार भएको पाँचौं महिला साफ च्याम्पियनसिपको संयुक्त सर्वाधिक गोलकर्ता बनेकी थिइन् । सावित्रा र भारतीय फुटबल टोलीकी इन्दुमति कासिरेथान संयुक्त उच्च गोलकर्ता बनेका थिए । च्याम्पियनसिपमा दुवैले समान ४ गोल गरेका थिए ।