एजेन्सी – स्पेनिस ला लिगा क्लब भ्यालेन्सियाले आफ्ना मुख्य प्रशिक्षक मार्सेलिनोलाई बर्खास्त गर्दै अर्काे स्पेनिस क्लब रियल म्याड्रिडका पुर्व सहायक प्रशिक्षक अल्वर्ट सेलाडेसलाई अनुबन्ध गरेको छ ।

दुईवर्ष अघि भ्यालेन्सियाका प्रशिक्षकमा नियुक्त भएका मार्सेलिनोले भ्यालेन्सियालाई चौथो स्थानमा राख्दै च्याम्पियन्स लिगको लागि छनोट गराएका थिए । सेभिया र भिल्लारियलका पुर्व प्रशिक्षक समेत रहेका ५४ वर्षीय मार्सेलिनोले गत सिजन भ्यालेन्सियालाई ११ वर्षपछि पहिलो उपाधिको रुपमा कोपा डेल रे जिताएका थिए । क्लबका मालिक पिटर लिमसँगको खटपट नै उनको बर्खास्तीको मुख्य कारण रहेको बुझिएको छ ।

अन्तर्राष्ट्रिय विश्राम अघि भ्यालेन्सियाले ला लिगामा खराव प्रदर्शन गरेको थियो । रियल सोसिडाडसँग १–१ को बराबरी खेलको भ्यालेन्सिया सेल्टा भिगोसँग १–० ले तथा मलोर्कासँग २–० ले पराजित भएको थियो । भ्यालेन्सिया यो सिजनमा ३ खेलबाट ४ अंक जोडेर १०औं स्थानमा छ ।

उनको स्थानमा ४३ वर्षीय सेलाडेसले २०२१ सम्म भ्यालेन्सियाको प्रशिक्षण सम्हाल्नेछन् । उनले बुधबारदेखि नै क्लबमा प्रशिक्षण शुरु गरिसकेका छन् । भ्यालेन्सियाले आइतबार ला लिगाका क्याटलान क्लब बार्सिलोनासँग तथा मंगलबार च्याम्पियन्स लिगमा इंग्लिस क्लब चेल्सीसँग प्रतिस्पर्धा गर्दैछ ।