एजेन्सी – फरवार्ड लौटारो मार्टिनेजले ह्याट्रिक गरेपछि अर्जेन्टिनाले अन्तर्राष्ट्रिय मैत्रीपूर्ण खेलमा मेक्सिकोलाई ४-० ले पराजित गरेको छ । खेलको सबै गोल पहिलो हाफमा नै सम्भव भएको थियो ।

लौटारोले खेलको १७ औं मिनेटमा गोल गर्दै अर्जेन्टिनालाई अग्रता दिलाएका थिए । उनले २२ औं मिनेटमा अग्रता दोब्बर पारे । ३३ औं मिनेटमा लिआन्द्रो पारेडेसले पेनाल्टीमा गोल गर्दै अर्जेन्टिनाको अग्रता ३-० ले बढाए । ३९ औं मिनेटमा लौटारोले आफ्नो ह्याट्रिक पूरा गरे ।

मुख्य फरवार्ड लिओनेल मेस्सीको अनुपस्थितिमा इन्टर मिलानबाट खेल्दै आएका लौटारोले उत्कृष्ट प्रदर्शन गरे । प्रशिक्षक लिओनेल स्कालोनीले उनलाई पहिलो हाफमा ह्याट्रिक गरेपनि दोस्रो हाफमा भने मैदानमा उतारेनन् । उनको स्थानमा पाउलो डिबालाले दोस्रो हाफ खेलेका थिए । लौटारोले अर्जेन्टिनाका लागि १२ खेल खेल्दै ६ गोल गरिसकेका छन् ।

खेल अवधिभर अर्जेन्टिनाले मेक्सिकोलाई पूर्ण दबाबमा राखेको थियो । मेक्सिकोका लागि गोलको एकमात्र आक्रमण हर्भीङ लोजानोले ९० औं मिनेटमा गरेका थिए । अर्जेन्टिनाका लागि गोलरक्षक एस्टेबान अन्द्रादाले त्यसबाहेक कुनै प्रहारमा मिहिनेत नै गर्नु परेन । मेक्सिकोले आफ्नो पहिलो रोजाईको टोली उतारेपनि अर्जेन्टिनाको दोस्रो रोजाईको टोलीलाई समस्या दिन सकेन ।