एजेन्सी – स्टार फरवार्ड नेयमारले झन्डै चार महिनापछि पुनरागमन गर्दा ब्राजिलले अन्तर्राष्ट्रिय मैत्रीपुर्ण खेलमा कोलम्वियासँग बराबरीको नतिजा निकालेको छ ।

शनिबार बिहान अमेरिकामा भएको खेलमा दक्षिण अमेरिकी च्याम्पियन ब्राजिलले कोलम्वियासँग २–२ गोलको बराबरी खेलेको हो । पुनरागमन खेलमा नेयमारले एक गोल गर्नुका साथै १ गोलको असिस्ट गरेका थिए ।

नेयमारले गत जुनमा कोपा अमेरिका कपको प्रशिक्षण दौरान एन्कल इन्ज्युरीका कारण चोट बोकेका थिए । त्यसयता उनी टोलीमा समेटिएका थिएनन् । ब्राजिलले कोपा अमेरिका कप जित्दा नेयमार टोलीमा थिएनन् ।

हार्ड रक स्टेडियम मियामी गार्डेन्समा खेलको १९औं मिनेटमा नेयमारको कर्नरबाट आएको पासमा क्यासमिरोले गोल गर्दै ब्राजिललाई १–० को अग्रता दिलाए । तर, ब्राजिलको त्यो अग्रता लामो समय टिकेन ।

२५औं मिनेटमा लुइस मुरेलले पेनाल्टीमा बराबरी गोल फर्काए । क्यासमिरोले विपक्षी खेलाडीलाई पेनाल्टी बक्समा फल गरेपछि प्राप्त पेनाल्टीमा लुइस चुकेनन् । ३४औं मिनेटमा मुरेलले गोल गर्दै कोलम्वियालाई पहिलो हाफमा २–१ को अग्रता दिलाए ।

५८औं मिनेटमा नेयमारले बराबरी गोल फर्काए । उनको यो राष्ट्रिय टोलीका लागि ९८ खेलमा ६१ औं गोल हो । उनीभन्दा अघि पेले (७७) र रोनाल्डो (६२) भन्दा मात्रै पछि छ ।

त्यसपछि थप गोल निस्कन नसक्दा खेल २–२ गोलको बराबरीमा सकियो । ब्राजिल २०१८ को विश्वकपमा बेल्जियमसँग पराजित भएयता पछिल्लो १७ खेलमा अपराजित छ ।