एजेन्सी – युरोकप छनोटको समूह ‘जी’ को शीर्षस्थानमा रहेको पोल्यान्डले पहिलो हार बेहोरेको छ । पोल्यान्डले घरेलु टोली स्लोभेनियासँग २–० को हार बेहोरेको हो । पोल्यान्डलाई हार चखाउन अल्जाज स्ट्रुना र अन्ड्राज स्पोररले गोल गरे ।

हारसँगै पोल्यान्ड ५ खेलबाट १२ अंक जोडेर शीर्षस्थानमै यथावत छ । स्लोभेनिया ५ खेलबाटै ८ अंक जोडेर तेस्रो स्थानमा छ ।

यही समूहको अर्काे खेलमा अस्ट्रियाले लत्भियालाई ६–० को फराकिलो गोल अन्तरले पराजित गरेको छ । अस्ट्रियाको फराकिलो जितमा मार्काे अर्नाेटोभिकले दुई तथा, मार्सेल सविट्जर, कोनराड लेइमेर र मिचेलले गोल गरे । एक गोल उपहार पाएको थियो ।

गोलको वर्षा भएको खेलमा सुरुवातदेखि नै आक्रमक खेल पस्केको अस्ट्रियाले सातौ मिनेटमा मार्काेको गोलमा अग्रता लिएको थियो । १३औं मिनेटमा मार्सेलले अग्रता दोब्बर बनायो ।

५३औं मिनेटमा मार्काेले व्यक्तिगत दोस्रो गोल गरेपछि अस्ट्रिया खेलमा सहज जिततर्फ अग्रसर बनेको थियो । ७६औं मिनेटमा पाभेल्सले आत्मघाती गोल गरेपछि अस्ट्रियाले ४–० को अग्रता बनाउन सफल भयो ।

८०औं मिनेटमा कोनराडले गोल गरे । ८५औं मिनेटमा मिचेलले गोल गर्दै अस्ट्रियालाई ६–० को प्रभावशाली जित दिलाए । जितसँगै अस्ट्रिय समूह ‘जी’ मा ५ खेलबाट ९ अंक जोडेर दोस्रो स्थानमा उक्लिएको छ । पराजित लत्भिया अंकविहीन हुदै पुछारमा छ ।