एजेन्सी – विश्वकप छनोटको तयारीका क्रममा रहेको जापानले मैत्रीपूर्ण खेलमा बिहीबार दक्षिण अमेरिकी टोली पाराग्वेलाई २-० ले पराजित गरेको छ ।

जापानको काशीमा रंगशालामा भएको खेलमा दुवै गोल पहिलो हाफमा सम्भव भएको थियो । युया ओसाकोले २३ औं मिनेटमा गोल गरेपछि जापानले सुरुवाती अग्रता बनाएको थियो । उनले भेट्रान डिफेन्डर युटो नागाटोमोको क्रसलाई सहजै गोलमा परिणत गरेका थिए । उनको यो १५ औं अन्तर्राष्ट्रिय गोल पनि हो । त्यसको दुई मिनेटमा नै जापानले अग्रता दोब्बर पार्ने अवसर पाएपनि वन भर्सेस वनमा रित्सु दोआनको प्रहारलाई गोलरक्षक गैटो फर्नान्डेजले बचाए ।

खेलको ३० औं मिनेटमा ताकुमी मिनामिनोले जापानको अग्रता दोब्बर पारे । उनले फ्रान्सेली क्लब मार्सेबाट खेल्दै आएका राइट ब्याक हिरोकी सकाईको क्रसलाई पहिलो टचमा नै गोलमा परिणत गरेका थिए । दोस्रो हाफमा वैकल्पिक खेलाडीको रुपमा मैदान प्रवेश गरेका तकेफुसा कुबोले पनि गोल गर्ने अवसर चुकाए । उनले ६९ औं मिनेटमा गरेको प्रहार पोस्टमा लागेर फर्केको थियो । रियल म्याड्रिडका खेलाडी कुबो यस सिजनका लागि लोनमा मालोर्का पुगेका छन् ।

जापानले विश्वकप छनोट अन्तर्गत मंगलबार हुने खेलमा म्यानमारको सामना गर्दैछ । जापान रहेको समूह ‘एफ’ मा मंगोलिया, ताजिकिस्तान र किर्गिस्तान पनि रहेका छन् । मंगोलियाले घरेलु मैदानमा म्यानमारलाई १-० ले स्तब्ध पार्दै सुखद सुरुवात गरिसकेको छ । ताजिकिस्तानले पनि घरेलु मैदानमा किर्गिस्तानविरुद्ध १-० को जित दर्ता गरेको हो ।