एजेन्सी – यूईएफए च्याम्पियन्स लिग अन्तर्गत समूह चरणको पहिलो खेलमा फ्रान्सेली च्याम्पियन पेरिस सेन्ट जर्मेन (पीएसजी) र स्पेनिस महारथी रियल म्याड्रिड आमनेसामने हुँदैछन् । सेप्टेम्बर १४ मा यी दुई टोलीबीच खेल हुनेछ ।

च्याम्पियन्स लिगको एकै समुहमा परेका यी दुई टोली पहिलो खेलमा नै भिड्ने भएका हुन् । रियलका लागि भने पीएसजीको चोटको समस्याले केहि सहज हुने देखिएको छ । रियलविरुद्ध पहिलो खेलमा स्टारत्रय एडिन्सन काभानी, नेयमार र किलियन एमबाप्पे नै उपलब्ध नहुने सम्भावना बढेको छ । नेयमारले प्रतिबन्धका कारण पहिलो खेल गुमाउने यसअघि नै पक्का भइसकेको थियो । उनले गत सिजन म्यानचेस्टर युनाइटेड र पीएसजीबीचको खेलबारे सामाजिक संजालमा बोलेपछि यूईएफएले उनलाई तीन खेल प्रतिबन्ध लगाएको थियो ।

यता काभानी र एमबाप्पे भने चोटका कारण उपलब्ध नहुने सम्भावना बढेको हो । लिगको पहिलो खेलमा टुलुसविरुद्ध मांशपेशीको समस्या आएपछि एमबाप्पे मैदानबाहिर छन् । उनले रियलविरुद्ध खेलमा पुनरागमन गर्ने सम्भावना न्यून रहेको छ । यता काभानी पनि उक्त खेलमा हाफटाइम पछि कम्मरको चोटका कारण मैदान फर्केका थिएनन् । उनलाई पनि ३ साता समय लाग्ने बुझिएको छ ।

काभानी रियलविरुद्ध खेलका लागि फिट हुने देखिएपनि उनले पहिलो रोजाईदेखि नै खेल्नेमा भने शंका छ । उनले अबको दुई साता पूर्ण विश्राम लिने बुझिएको छ । च्याम्पियन्स लिगको समूह ‘ए’ मा रियल र पीएसजीसँगै क्लब ब्रुज र गालाटासरे रहेका छन् ।

यो पनि : रियल र पीएसजी एकै समूहमा