एजेन्सी – स्पेनिस ला लिगाको साविक विजेता बार्सिलोनाले शनिबार लिगअन्तर्गत खेलमा ओसासुनाको सामना गर्दैछ । खेल नेपाली समयअनुसार राती ८:४५ मा सुरु हुनेछ ।

कप्तान लिओनेल मेस्सी र फरवार्ड लुइस सुआरेज चोटका कारण अझै केहि समय बाहिर रहने भएपछि बार्सिलोनाका लागि नयाँ फरवार्ड एन्टोइन ग्रिजमन आक्रमणमा आशाका केन्द्र बन्ने पक्का भएको छ । पछिल्लो खेलमा रियल बेटिसविरुद्ध ५-२ को जितमा ग्रिजमनले मेस्सी र सुआरेजको अनुपस्थितिमा २ गोल गर्दै टोलीलाई जितसम्म डोर्याएका थिए । म्यान अफ द म्याच प्रदर्शन गरेका ग्रिजमन उच्च मनोबलमा छन् ।

सुआरेज र मेस्सी अब दुई सातापछि मात्र मैदान फर्कनेछन् । यसबीचमा अन्तर्राष्ट्रिय खेलहरु हुने भएकाले दुवै फरवार्डले पर्याप्त विश्राम पाउने छन् । यी दुईसँगै युवा विंगर ओस्मान डेम्बेले पनि चोटका कारण विश्राममा नै रहनेछन् । युवा खेलाडी कार्लोस पेरेजले यस्तो अवस्थामा आफूले पाएको अवसरको भरपुर सदुपयोग गरेका छन् । १६ वर्षीय अन्सु फातीले कलिलो उमेरमा नै डेब्यु गर्दै केहि सम्भावना देखाएका छन् । ओसासुनाविरुद्ध पनि उनलाई टोलीमा समेटिएको छ ।

ओसासुनाको घरेलु मैदान एल सदरमा ग्रिज्मनले हालसम्म गोल गर्न सकेका छैनन् । उनले यसअघि उक्त मैदानमा ५ पटक खेलेका छन् । बार्सिलोनाले सिजनको पहिलो खेल घरेलु मैदानबाहिर खेलेको थियो र त्यस खेलमा एथ्लेटिक बिल्बाओसँग पराजित भएको थियो । यस खेलका लागि मिडफिल्डमा भने बार्सिलोनालाई सुखद खबर रहेको छ । आर्थर, आर्टुरो भिडाल र इभान राकीटिच चोटबाट निको भएर सुरुवातदेखि खेल्न तयार रहेका छन् ।