एजेन्सी – यूईएफए च्याम्पियन्स लिगको समूह चरणको ड्र बिहीबार सम्पन्न भयो । समूह चरण ड्र कै क्रममा यूईएफएले विधागत अवार्ड तथा वर्षको सर्वोत्कृष्ट खेलाडी घोषणा भयो । मुख्य अवार्ड प्रदान गर्नुअघि कार्यक्रम संचालकले मेस्सी र रोनाल्डोसँग गरेको कुराकानी विशेष क्षण थियो ।

पोर्चुगिज फरवार्ड क्रिस्टियानो रोनाल्डोले मेस्सी र उनको प्रतिस्पर्धाले दुवै खेलाडीलाई निकै फाइदा पुगेको बताए । ‘ हामीले १५ वर्ष एकै स्टेजमा प्रतिस्पर्धा गर्यौं । मलाई लाग्दैन दुई खेलाडीले एकै समय यसरी वर्चस्व जमाएका छन् । यो पक्कै सहज हैन । हामी दुई बीच राम्रो सम्बन्ध छ यद्यपि हामीले अहिलेसम्म कतै सँगै बसेर खाएका छैनौं, तर आशा छ त्यो पनि हुनेछ,’ रोनाल्डोले भने ।

इटाली गएपछि स्पेन र मेस्सीसँगको प्रतिस्पर्धाबारे बोल्दै रोनाल्डोले इतिहासको एक पाटो बन्न पाएको अनुभव साटे । ‘स्पेनमा खेलेको निकै याद आउँछ । मेस्सी र मैले १५ वर्ष एक अर्कासँग प्रतिस्पर्धा गर्यौं । यसले मलाई र उनी दुवैलाई अझ राम्रो गर्ने मनोबल मिलेको छ । फुटबलको इतिहासमा आफ्नो नाम लेखाएका छौं । त्यसमा म पनि छु र उनी पनि छन्,’ रोनाल्डोले थपे ।

यता मेस्सीले पनि रोनाल्डोसँग एकै स्थानमा खेल्न पाउँदा खुसी लागेको बताए । ‘ रोनाल्डोसँग प्रतिस्पर्धा गर्नु सुखद पक्ष थियो । हामीले निकै गोल गर्यौं । गोल गर्नुको लक्ष्य विजय प्राप्तिको लागि थियो र दुवैले सक्दो प्रयास गर्यौं,’ मेस्सीले भने ।

संन्यास लिने विषयमा सोध्दा रोनाल्डोले आफू मेस्सीभन्दा २ वर्ष कम उमेरको भएपनि सँगै संन्यास लिने सम्भावना रहेको बताए । ‘ म मेस्सीभन्दा २ वर्ष बढी उमेरको हुँ । मैले अहिले नै संन्यास लिने सोचेको छैन । अझै ३-४ वर्ष मैदानमा देखिनेछु,’ उनले थपे ।