एजेन्सी– स्विडिस फरवार्ड ज्लाटान इब्राहिमोभिचले आफू अझै पनि प्रिमियर लिगका लागि योग्य र सक्षम रहेको बताएका छन् । उनले ठट्यौली पारामा म्यानचेस्टर युनाइटेडले चाहेको खण्डमा आफु इग्ल्यान्ड फर्कन सक्ने संकेत पनि गरे । ३७ वर्षे स्वीडिस फरवार्ड अहिले एमएलएस टोली एलए ग्यालेक्सीबाट खेलिरहेका छन् ।

अहिले पनि उनी मैदानमा छाइरहेका छन् । ग्यालेक्सी जानुअघि इब्राहिमोभिचले युनाइटेडका लागि ५३ खेलमा २९ गोल गरेका थिए । उनले आइतबारमात्र लस एन्जेलेस फुटबल क्लबविरुद्ध २ गोल गरेका थिए । यो सिजन ग्यालेक्सीका लागि उनले २२ गोल गरिसकेका छन् ।

युनाइटेडबाट रोमेलु लुकाकु र एलेक्सीस सान्चेजले युनाइटेड छाडेका छन् । युनाइटेड प्रशिक्षक ओलने गुनार सोल्सजर टोली पूर्ननिर्माणका क्रममा रहेका छन् । मार्कस रासफोर्ड, एन्टोनी मार्सियल र १७ वर्षे मासन ग्रिनउड मात्र अहिले टोलीका स्थापित फरवार्ड हुन् ।

‘ म अहिले पनि सहजै प्रिमियर लिग खेल्न सक्छु । यदि युनाइटेडले चाहन्छ भने म त्यहाँ हुनेछु,’ इब्राहिमोभिचले भने,‘ तर म अहिले ग्यालेक्सीमा छु ।’ इब्राहिमोभिचले ओल्ड ट्राफोड छाडेको १७ महिना बितेको छ ।

युनाइटेड भने प्रिमियर लिगमा कमजोर रुपमा प्रस्तुत भइरहेको छ । युरोपमा रहँदा उनले आफ्नो क्षमता अनुसारको प्रदर्शन गरेको स्मरण गर्दै इब्राहिमोचिभले भने,‘ मैले युरोपमा रहँदा ३३ वटा ट्रफी जिते । त्यसैयहाँ पनि म अझै केहि गर्न सक्छु भनेर आएको हु ।’ युनाइटेड, बार्सिलोनालगायत उनले युरोपका चर्चित क्लबबाट व्यवसायिक फुटबल खेलेका थिए ।

युनाइटेड शनिबार प्रिमियर लिगमा क्रिस्टल प्यालेससँग २–१ ले पराजित भएको थियो । टाढा रहेपनि इब्राहिमोभिच युनाइटेडको खेल पछ्याइरहेका हुन्छन् । ‘मैले युनाइटेडको पछिल्लो खेल हेरे । टोलीलाई भाग्यले साथ दिएन । यदि रासफोर्डले पेनाल्टीमा गोल गर्थे भने परिस्थिति अर्को हुन्थ्यो,’ उनले भने, ‘ तर, इग्ल्यान्डमा भनेको अन्तिम समय सम्म पनि खेल टुंगिएको हुँदैन । जे पनि हुन सक्छ ।’