एजेन्सी – रियल म्याड्रिडका कप्तान तथा डिफेन्डर सर्जियो रामोसले ब्राजिलियन फरवार्ड नेयमार विश्वका उत्कृष्ट ३ खेलाडीको सुचिमा पर्ने बताएका छन् ।

फ्रान्सेली क्लब पेरिस सेन्ट जर्मेन (पीएसजी) का स्टार नेयमार पछिल्लो समय ट्रान्सफर बजारमा सरुवाको हल्लाले चर्चामा छन् । उनले यसअघि नै पीएसजी छाडेर जाने संकेत दिएका कारण रियल म्याड्रिड र बार्सिलोना दुवै टोलीले उनलाई अनुबन्धन गर्न प्रस्ताव पनि राखिसकेका छन् । पीएसजीले हालसम्म दुवै क्लबको प्रस्ताव अस्विकार गरेको छ । इटालियन क्लब युभेन्टसले पनि नेयमारको अवस्थालाई नजिकबाट नियालेको बुझिएको छ ।

यसक्रममा रियलका कप्तान रामोसले नेयमारको प्रशंसा गरेका छन् । ‘नेयमार उत्कृष्ट खेलाडी हुन्, विश्वका शीर्ष ३ खेलाडीमा पर्छन् । हाम्रो टोलीमा खेलाडी अनुबन्धन बारे कुरा गनु उची हुँदैन । हाम्रो टोली अहिले राम्रो अवस्थामा छ । ट्रान्सफर बजार खुला रहुन्जेल जो खेलाडी पनि आउने जाने हुन सक्छ, यसमा चर्चा गरेर बस्नु जायज छैन,’ उनले भने ।

रामोसले नेयमार नआएपनि टोली बलियो रहेको अभिव्यक्ति दिए । ‘ हामी अहिले उपलब्ध टोली बलियो छौं । ग्यारेथ बेल र हामेस रोड्रीग्वेज पनि अब टोलीमा मिसिएका छन् । हामी एकवद्ध भएर अगाडि बढ्नु आवश्यक छ,’ रामोसले थपे । उनले गोलरक्षक केलर नाभास र थिबाउट कोर्टुवा दुवै उत्कृष्ट रहेको र दुवै क्लबसँग रहनेमा आशावादी रहेको बताए ।