एजेन्सी – लन्डन क्लब चेल्सीले इंग्लिस प्रिमियर लिगअन्तर्गत नर्विच सिटीलाई पराजित गर्दै सिजनको पहिलो जित दर्ता गरेको छ । नर्विचको घरेलु मैदानमा चेल्सीले दुई पटक अग्रता गुमाएपनि ट्यामी अब्राहमले दुई गोल गरेपछि ३-२ को जित दर्ता गरेको हो ।

चेल्सीले खेलको तेस्रो मिनेटमा ट्यामी अब्राहमको गोलमा अग्रता लिएको थियो । कप्तान सेजार एज्पिलिक्वेटाको पासमा अब्राहमले पाहुना टोलीलाई अग्रता दिलाएका थिए । तर त्यसको तीन मिनेट नबित्दै टिमु पुक्कीको पासमा टड कान्टवेलले गोल गर्दै घरेलु टोलीलाई बराबरीमा ल्याए ।

चेल्सीका युवा मिडफिल्डर मेसन माउन्टले यसै सिजन बोरुसिया डर्टमन्डबाट चेल्सी आएका क्रिस्टियन पुलिसिकको पासमा गोल गर्दै चेल्सीलाई अगाडी बढाए । लयमा रहेका फरवार्ड पुक्कीले बुएनडीयाको पासमा गोल गर्दै खेल पुन: बराबरीमा ल्याए ।

दोस्रो हाफमा अब्राहमले चेल्सीको अग्रता पुन: स्थापना गरे । उनले माटियो कोभाचिचको पासलाई गोलमा परिणत गरेका थिए । यस जितसँगै चेल्सीले नयाँ प्रशिक्षक फ्रान्क लाम्पार्डको नियुक्तिपछि पहिलो जित दर्ता गरेको छ । लाम्पार्ड डर्बी काउन्टीको जिम्मेवारी छाडेर यसै सिजन चेल्सी आएका हुन् ।

यस नतिजासँगै चेल्सीले ३ खेलमा १ जित, १ हार र १ बराबरसँगै ४ अंक जोडेको छ । नर्विच भने १ जित र २ हारसँगै ३ अंकमा रहेको छ ।