एजेन्सी – पोर्चुगलका युवा मिडफिल्डर रेनाटो सान्चेसले अन्तत: बायर्न म्युनिख छाडेका छन् । उनी १५ मिलियन युरोमा फ्रान्सेली क्लब लिल पुगेका छन् ।

सन् २०१६ को युरोमा पोर्चुगलका लागि प्रभावशाली प्रदर्शन गर्दै बायर्न पुगेका सान्चेसले जर्मनीमा भने राम्रो प्रदर्शन गर्न सकेनन् । पोर्चुगललाई युरो कपको उपाधि दिलाउन महत्त्वपूर्ण भूमिका निर्वाह गरेपछि बायर्नले मोटो रकम खर्चेर उनलाई बेन्फिकाबाट अनुबन्धन गरेको थियो । विश्व फुटबलका उत्कृष्ट मध्यका मिडफिल्डर बन्ने अनुमान गरिएपनि उनले त्यसयता भने राम्रो प्रदर्शन गर्न सकेनन् । प्रिमियर लिग क्लब स्वान्सीमा एक सिजन लोनमा बिताएका उनले त्यहाँपनि प्रभाव जमाउन सकेनन् ।

बायर्नमा बस्ने उनको चाहना भएपनि मैदानमा उची समय नपाएपछि उनले क्लब छाड्ने निर्णय लिएका थिए । तर बायर्न भने उनलाई सजिलै जान दिने पक्षमा थिएन । यसअघि दुई पटक बायर्नले उनको आग्रहलाई अस्विकार गरेको थियो । सान्चेसले सार्वजनिक रुपमा नै बायर्नमा मौका नपाएको बताएपछि क्लबले लिलको प्रस्ताव स्वीकार गरेको हो । उनले शुक्रबार फ्रान्स पुगेर ५ वर्षको सम्झौता गरिसकेका छन् ।

बायर्नका प्रमुख अधिकृत कार्ल-हाईन्ज रुमिनेजका अनुसार सान्चेसले खेल्ने मौका नपाउनु नै उनले क्लब छाड्नुको मुख्य कारण हो । सन् २०२० मा हुने युरोका लागि पोर्चुगलको राष्ट्रिय टोलीमा पर्नु उनको लक्ष्य रहेको र बायर्नमा उचित खेल्ने समय नपाउने भएकाले उनी क्लब छाड्न बाध्य भएको कार्लले जानकारी दिए ।