एजेन्सी – जर्मन च्याम्पियन बायर्न म्युनिखमा एक वर्षका लागि लोनमा आबद्ध हुने क्रममा रहेका फिलिप्पे काउटिन्हो मेडिकल परिक्षणका लागि म्युनिख पुगेका छन् । क्लबमा आबद्ध हुने औपचारिकता पुरा गर्न म्युनिख पुगेपछि काउटिन्होले क्लबका समर्थकसँग मुस्कुराउँदै तस्बिर खिचाएका थिए ।

बायर्न र बार्सिलोनाबीच उनको विषयमा एक वर्षको लोन सम्झौता भएको थियो । जसका कारण शुक्रबार ला लिगामा बार्सिलोनाको एथलेटिको बिलबाओसँगको खेलमा उनी टोली थिएनन् । त्यो खेलमा बार्सिलोनाले १–० ले गुमाएको थियो ।

त्यसअघि पेरिस सेन्ट जर्मेन (पिएसजी) बाट नेयमार भित्राउने र काउटिन्होलाई पिएसजी पठाउने बार्सिलोनाको योजनामा पहिल सफल हुन सकेन । अहिले लोन सम्झौता एक वर्षको भएपनि अर्को वर्ष बायर्नले चाहेमा स्थायी रुपमा उनलाई राख्न सक्नेछ ।

लगातार सात पटक बुन्डेसलिगा च्याम्पियन बार्यनको पनि यसपटकको सुरुवात बराबरीबाट भएको छ । शुक्रबार हेराथ बर्लिन र बार्यनबीचको खेल २–२ को बराबरीमा टुंगिएको थियो । शनिबार साल्केविरुद्ध हुने खेलमा काउटिन्होले खेल्ने सम्भावना रहेको छ । टोलीको बराबरीपछि बार्यनका सिइओ कार्ल हेन्ज रुमिनिगीले दुई क्लबबीच सम्झौता भएको जानकारी दिएका थिए ।

‘केहि दिनमा उनी म्युखिन आउनेछन् । यहाँ आएपछि स्वास्थ्य परिक्षण हुनेछ र उनले सम्झौता गर्नेछन्,’ उनले भनेका थिए, ‘बार्सिलोनालाई धन्यवाद दिन चाहन्छु । त्यहाँका अध्यक्ष पनि मेरो राम्रो मित्र हुन् । त्यसै कारण पनि हामी खेलाडी लिन सफल भयौं । उनी हाम्रो लागि महत्वपूर्ण हुनेछन् । नामका हिसाबले मात्र होइन, जसरी उनी खेल्छन् । आक्रमक खेलका लागि उनी क्षमतावान छन् । र हामी खुसी छौं । ‘